რუსეთის პრეზიდენტმა, ვლადიმერ პუტინმა ჰელსინკიში სამიტის დროს აშშ-ის პრეზიდენტს, დონალდ ტრამპს ფეხბურთის ბურთი აჩუქა. ნაჩუქარმა ბურთმა კი დიდი აჟიოტაჟი გამოიწვია. ხშირად ხუმრობით, თუმცა მაინც ამბობდნენ, რომ ბურთი მოსასმენ აპარატურაზე უნდა შეამოწმონ. რესპუბლიკელმა სენატორმა, ლინდსი გრეჰემმა დატვიტა, რომ საჩუქარს აუცილებლად შეამოწმებდა და თეთრ სახლში არასდროს დაუშვებდა.

როგორც Bloomberg წერს, ბურთს მართლაც აქვს მიკროჩიპი პატარა ანტენით. ეს არა სათვალთვალო მოწყობილობა, არამედ Adidas-ის ბურთის სარეკლამო ფუნქცია აღმოჩნა. კომპანიის ვებვერდზე განმარტებულია, რომ ტექნოლოგია მომხმარებლებს საშუალებას აძლევს სხვადასხვა ფუნქციაზე ჰქონდეთ წვდომა, მათ შორის, ექსკლუზიურ ინფორმაციაზე, Adidas-ის საფეხბურთო კონტენტსა და სპეციალურ შეჯიბრებებზე.

Adidas არ განმარტავს რამდენად დაცულია მათი ბურთი და შეუძლია თუ არა რუსეთს მისი "თავისი მიზნებისთვის" გამოყენება. ვებგვერდზე განმარტებულია, რომ შეუძლებელია ჩიპის წაშლა ანდა გადაწერა.

თეთრი სახლის პრესმდივანმა განაცხადა, რომ როგორც ყველა საჩუქარმა, ბურთმაც უსაფრთხოების ყველა პროცედურა გაიარა. გამოცემის განმარტებით, თეთრმა სახლმა არ თქვა აღმოაჩინეს თუ არა რამე ბურთში და სად იქნება ის განთავსებული.

პრესკონფერენციაზე დონალდ ტრამპმა ბურთის მიღებისას პუტინს მადლობა გადაუხადა და ის თავის ცოლს, მელანი ტრამპს გადაუგდო. პრეზიდენტმა თქვა, რომ ბურთს თავის შვილს, ბარონს მისცემდა.

მელანია ტრამპი ჰელსინკის სამიტზე პუტინის მიერ ნაჩუქარი ბურთით, 2018 წელი

ფოტო: Associated Press