ქართული ოცნების პოლიტსაბჭოს თავმჯდომარე ბიძინა ივანიშვილი პირველ არხთან ინტერვიუში ხეების გადატანის პროცესსაც გამოეხმაურა. მისი თქმით, ოპოზიციის ყველა სხვა ბრალდებიდან ხეების თემა ყველაზე ლეგიტიმურია და რეალობასთან ახლოს დგას.

ივანიშვილის თქმით, სულ 120 გადატანილ ხეზეა საუბარი და ეს რიცხვი შესაძლოა 140-ზე ავიდეს.

"პლუსის მეტი, რასაც ვაკეთებ, არაფერი არაა. ბრალდებები, რომ რკინიგზა გადავკეტეთ, საცობები შევქმენით, რომ გავანადგურეთ მწვანე ბუნება და ეკოლოგია და ბუნება აღარ აღდგება, სიცრუეა. შემიძლია ოპოზიციასაც კი შევხვდე საჯაროდ ამ თემაზე", - განაცხადა ბიძინა ივანიშვილმა.

მისი თქმით, ერთადერთი მინუსი რაც ხეების გადატანის პროცესს აქვს არის ის, რომ ბევრი ფული იხარჯება.

"ფულს ვხარჯავ ამ პარკში იმიტომ, რომ მხოლოდ საქართველოში და საზოგადოებაში რჩება, 10 -12 მილიონი ლარი მიიღო ხალხმა რომ ნაკვეთზე გავეკარებინე. ეს ფული რჩება მოსახლეობაში, რკინიგზას დიდი ფული აქვს მიღებული, რომ ჩახსნას და გადაიტანოს... არ ყოფილა მატარებლის მოძრაობს შეფერხების შემთხვევები და რუსთავი 2 ცრუობს", - განაცხადა ბიძინა ივანიშვილმა.

მისი თქმით, ხეების გადატანის გამო საქართველოში სამი ბორანი შემოვიდა, რომელიც დარჩება და ეკონომიკას გამოადგება.

"14 000 000 ლარი შევიდა ამ პროექტით ბიუჯეტში. მაქსიმუმ 15-10 წუთიანი საცობი შეიქმნა ამაზე მეტი არაფერი გაფუჭებულა, მე რომ ეკოლოგიაზე მსაყვედურობს ხალხი, რომელსაც ერთი ხე არ დაურგამთ, მარტო ჭოროხზე გავიდნენ და ნახონ - ათასობით ევკალიფტი დავრგე და ყველაზე ცუდ ადგილზე, ყველაზე კარგი რამ გაკეთდა, ეს პარკი ხალხის იქნება. ყველამ იცის, რომ ეს პარკი საზოგადოებრივია და ამბობენ, რომ საკუთარ სახლში მივათრევ, ერთი აქვს მინუსი რომ ეს პარკი ამ ფულად არ ღირდა", - განაცხადა ბიძინა ივანიშვილმა.