BBC-ის ინფორმაციით, საბერძნეთში ტყის ხანძარს სულ მცირე 75 ადამიანი ემსხვერპლა. მაშველების თქმით, მათ იპოვეს 26 მოზრდილისა და ბავშვის ცხედარი, რომლებიც გარდაცვალების მომენტში ერთმანეთს ეხუტებოდნენ. ოფიციალურ უწყებებში დაკარგულების შესახებ ზარები არ წყდება.

ათენის გარშემო, სამი მხრიდან ხანძრის ყველაზე მასშტაბური კერებია საკურორტო ქალაქ კინეტასთან, ქალაქებთან რაფინასთან, მატისა და პიკერმისთან და პენდელის მთის ფერდობებზე. რეგიონში ასობით მეხანძრეა მობილიზებული, ისინი ცეცხლის ლოკალიზებას უშედეგოდ ცდილობენ. ამ დროისთვის არსებული მონაცემებით, დაშავებულია 100-ზე მეტი ადამიანი.

პრემიერ-მინისტრმა, ალექსის ციპრასმა განაცხადა, რომ ტყეებში გაჩენილი ხანძრით გამოწვეული სიტუაცია კონტროლს აღარ ექვემდებარება. ციპრასის ინფორმაციით, ცეცხლს ებრძვის 600-ზე მეტი მეხანძრე და სამასზე მეტი სახანძრო ავტომანქანა, თუმცა, ვითარებას ძლიერი ქარი ართულებს. საბერძნეთის მთავრობამ დახმარებისთვის ევროკავშირს მიმართა. მზადყოფნა უკვე გამოთქვეს ესპანეთმა და კვიპროსმა. საბერძნეთს დახმარება შესთავაზა საქართველომაც.

საბერძნეთის პრემიერ-მინისტრმა, ალექსის ციპრასმა ქვეყანაში 3-დღიანი გლოვა გამოაცხადა.

"ყველაზე შემაძრწუნებელი სცენა, რაც კი ოდესმე მინახავს"

ფოტო: Reuters

ჟურნალისტის კოსტას კოუკოუმაკასი ყველა იმას, რაც ხანძრის ზონაში ნახა: "აქ რაც ხდება შავი ჯოჯოხეთია. მას შემდეგ, რაც ათასობით დამწვარ სახლსა და მანქანას ჩავუარე, მივაღწიე ეზოს, სადაც პოლიციელმა მითხრა, რომ ბევრი ადამიანი დაღუპული იპოვეს.

მე შემეძლო დამენახა ისინი მიწაზე ჭვარტლით დაფარულები, ტოქსიკური სუნი ატმოსფეროში ვრცელდებოდა. მათი უმეტესობა ტურისტია, რომლებიც გადარჩენას ცდილობდნენ, მაგრამ ვერ შეძლეს".

სამედიცინო სერვისების დირექტორი დიმიტრი პიროსი ამბობს, რომ დაშავებულები ძლიერი დამწვრობისგან და დაზიანებებისგან იტანჯებიან, რადგან მათ გარკვეული დრო ცეცხლში გაატარეს.

ხალხი ოკეანესა და პორტში მდგომ გემებს მიაწყდა გადასარჩენად.

"მადლობა ზღვას, რადგან ჩვენ შევძელით წყალში შესვლა. ცეცხლმა ზურგი დამიწვა და მე წყალში ჩავყვინთე. გავრბოდით, რომ თავი გადაგვერჩინა", - ამბობს გადარჩენილი კოსტას ლაგანოსი.

რამ გამოიწვია ცეცხლი?

ხანძარი მუდმივი პრობლემაა ცხელი და მშრალი ზაფხულის თვეების განმავლობაში ატიკის რეგიონში. ოფიციალური უწყებები ვარაუდობენ, რომ პირველად ცეცხლი მიტოვებულ სახლებში გაჩნდა.

15 ცეცხლის კერა ერთდროულად გაჩნდა ათენის სამ წერტილში", - განაცხადა მთავრობის სპიკერმა დიმიტრი ტსანაკოპოულოსმა.

მან დასძინა, რომ აშშ-ს დრონები სთხოვეს, რათა დააკვირდნენ და აღმოაჩინონ რაიმე საეჭვო აქტივობა.