დედაქალაქის მერმა კახა კალაძემ თბილისის სატრანსპორტო პოლიტიკის პრეზენტაცია გამართა. კალაძის თქმით, ახალი პოლიტიკის მიზანი დედაქალაქის საცობებისგან განტვირთვა და ჰაერის დაბინძურების მაჩვენებლის შემცირებაა.

თბილისის ახალი სატრანსპორტო პოლიტიკის მთავარი მიმართულებები

  • 2019 წლის ბოლოს, ამორტიზებული ავტობუსების სრულად ჩანაცვლება;
  • 2020 წლისთვის ახალი ავტობუსების რაოდენობის 900 ერთეულამდე გაზრდა;
  • 2019 წელს მეტროს, ავტობუსებისა და მიკროავტობუსების მარშრუტების განახლება და მათი სინქრონიზაცია, რომლის მიზანიც მგზავრდა ნაკადის ოპტიმალურად განაწილება და საზოგადოებრივ ტრანსპორტზე ხელმისაწვდომობის გაზრდაა;
  • 2021 წლამდე, რუსთაველის, წერეთლის, ყაზბეგის, ვაჟა-ფშაველას გამზირებზე, ასევე, მელიქიშვილისა და კოსტავას ქუჩებზე ავტობუსის ზოლების მოწყობა;
  • 2019-2021 წლებში, მეტროს 12 ახალი შემადგენლობის დამატება;
  • მიკროავტობუსების რაოდენობის შემცირება და მათი სრულად განახლება;
  • მიმდინარე წლიდან ტაქსების რეგულაცია სავალდებულო გახდება. თბილისის მერიამ უკვე გადაუგზავნა დოკუმენტი თბილისის საკრებულოს დასამტკიცებლად;
  • 2019 წლიდან მარჯვენასაჭიანი, ორკარიანი და განსხვავებული ფერის ტაქსების რეგულირება;
  • 2019 წლის პირველი ნახევრიდან, რამდენიმე ცენტრალურ უბანში პარკირების საათობრივი და ზონალური მართვის სისტემის საპილოტე პროგრამის ამოქმედება;
  • იგეგმება, ნაკადების მართვის "ჭკვიანი" სისტემის ამოქმედება, რაც "ჭკვიანი" შუქნიშნების მეშვეობით, მონაცემების შეგროვებას, სატრანსპორტო ნაკადების უკეთეს გადანაწილებასა და მოძრაობის ორგანიზების ოპტიმიზაციას გულისხმობს.