მესუთ იოზილის მიერ სანაკრებო კარიერის დასრულების გადაწყვეტილებამ ბევრი ადამიანი აალაპარაკა, მათ შორის პოლიტიკოსებიც.

შემთხვევას სიმწვავე იმან შესძინა, რომ იოზილმა მიზეზად რასიზმი დაასახელა. წერილში, რომელიც მან გამოაქვეყნა, იგი საუბრობდა იმაზე, რომ მარცხის დროს მას თურქულ ფესვებს ახსენებდნენ. მან ამაში გულშემატკივრებიც დაადანაშაულა და ასევე გერმანიის ფეხბურთის ფედერაციაც.

ამ მოვლენას გერმანიის იუსტიციის მინისტრი კატარინა ბარლიც გამოეხმაურა. მისი თქმით, ეს სახიფათო სიგნალია.

"როდესაც იოზილის დონის ფეხბურთელი გრძნობს, რომ იგი ქვეყნისთვის რასისტული მიზეზითაა არასასურველი, ეს საგანგაშო სიგნალს წარმოადგენს", - განაცხადა მინისტრმა.

მესუთ იოზილი გერმანიის ეროვნულ ნაკრებში 2009 წლიდან ირიცხებოდა, ხოლო ახალგაზრდული კარიერა მან ნაკრებში 2006 წელს დაიწყო.