კახეთში ძლიერი წვიმის შედეგად მდინარეები და ხევები ადიდდა. სტიქიამ სიღნაღის მუნიციპალიტეტში რამდენიმე სოფელი დააზარალა. სიღნაღის მუნიციპალიტეტის მერმა, გოგი გოგილაშვილმა ჟურნალისტებთან საუბრისას განაცხადა, რომ ძლიერი ნიაღვრისგან დაზიანებულია შიდა საუბნო გზები.

ფოტო: რადიო ჰერეთი

უხვი ნალექის გამო, ათეულობით საცხოვრებელი სახლის პირველ სართულებზე წყალი შევარდა. დაიტბორა ადგილობრივების სარდაფები და ეზოები. მოსახლეობას დაუზიანდა ავეჯი და საყოფაცხოვრებო ნივთები.

სტიქიის შედეგად სიღნაღში ელექტროგადამცემი ხაზებიც დაზიანდა რის გამოც ასობით აბონენტი ამ დრომდე ელექტროენერგიის გარეშეა დარჩენილი. ასევე დაიტბორა ლაგოდეხის მუნიციპალიტეტში სოფელ ჰერეთისკარში მდებარე რამდენიმე სახლი.

საგანგებო სიტუაციების მართვის სამსახურში On.ge-ს განუცხადეს, რომ სოფელ ჰერეთისკარში წყალი სარწყავი არხებიდან გადმოვიდა და საცხოვრებელი სახლების ეზოებში შევიდა. მაშველები ჰერეთისკარის სამ სახლში აწარმოებს წყლის ამოტუმბვის სამუშაოებს.

ფოტო: რადიო ჰერეთი