შინაგან საქმეთა სამინისტრომ პრეზიდენტ გიორგი მარგველაშვილის სიძის, მინდია გოგოჭურის მეგობარი თორნიკე კაჭარავა დააკავა. თორნიკე კაჭარავას ბრალად ცეცხლსასროლი იარაღის უკანონო შეძენა-შენახვა-ტარება ედება. ამის შესახებ უწყებამ განცხადება გაავრცელა.

უწყების მიერ გავრცელებულ განცხადებაში ნათქვამია, რომ მიმდინარე წლის 21 ივლისს, თბილისში, ახვლედიანის ქუჩაზე თორნიკე კაჭარავა მოპედით გადაადგილდებოდა.

"საპატრულო პოლიციის თანამშრომლებმა იგი ალკოტესტით შემოწმების მიზნით შეაჩერეს, თუმცა კაჭარავა მათ კანონიერ მოთხოვნას არ დაემორჩილა და მიმალვა სცადა. სამართალდამცველებმა დაკავებულის პირადი ჩხრეკისას "სტეჩკინის" მარკის ცეცხლსასროლი იარაღი ამოიღეს", - ნათქვამია შსს-ს განცხადებაში.

თორნიკე კაჭარავა პატიმრობიდან გირაოს სანაცვლოდ 2017 წლის 17 ივლისს გაათავისუფლეს. ის სამართალდამცველებმა ნარკოტიკების შეძენა შენახვის ბრალდებით დააკავეს. მაშინ პრეზიდენტის შვილი, ანა მარგველაშვილი აცხადებდა, რომ კაჭარავა და მისი კიდევ ერთი ახლო მეგობარი, მიხეილ თათრიშვილი, პრეზიდენტის ოჯახის მიმართ რეპრესიებს ემსხვერპლნენ და ამის გამო ჩაუდეს მათ ნარკოტიკული საშუალებები.