23 ივნისს ტაილანდის გამოქვაბულში ჩარჩენილი ბავშვებისა და მწვრთნელის გამოსაყვანი ოპერაცია დღესაც გრძელდება. იგეგმება, რომ დარჩენილი ოთხი მოზარდი და მათი მწვრთნელი დღეს გამოიყვანონ.

სამაშველო ოპერაცია ადგილობრივი დროით 10 საათზე დაიწყო და 19 მყვინთავი გამოქვაბულში უკვე შევიდა. გამოქვაბულში ოპერაციის განმავლობაში ბავშვებთან და მწვრთნელთან იყვნენ ექიმი და მაშველები.

The Guardian-ის ინფორმაციით, 8 ივლისს გამოყვანილმა ბავშვებმა მშობლები შუშის ფანჯრიდან უკვე ნახეს და, სავარაუდოდ, მალე მათთან საუბარს შეეძლებენ. მეორე ჯგუფის ბავშვები, რომლებიც 9 ივლისს გამოიყვანეს, ელოდებიან როდის ნახავენ ოჯახებს.

ექიმები ამბობენ, რომ ბიჭების ჯანმრთელობის მდგომარეობა დამაკმაყოფილებელია. იქიდან გამომდინარე, რომ ორ კვირაზე მეტი აბსოლუტურ სიბნელეში იყვნენ, მზისგან დამცავ სათვალეებს ატარებენ. გამოცემის ინფორმაციით, ბავშვებს საავადმყოფოში დარჩენა სულ მცირე ერთი კვირა მოუწევთ, ამიტომაც მოსკოვში მსოფლიო ჩემპიონატის ფინალზე ვერ წავლენ, სადაც ისინი ფიფამ დაპატიჟა.

რაც შეეხება ილონ მასკის მინიწყალქვეშა ნავს, სამაშველო ოპერაციის ხელმძღვანელმა განაცხადა, რომ მას არ იყენებენ.

სამაშველო ოპერაციის გეგმა

ფოტო: The Guardian

23 ივნისს გამოქვაბულში გაუჩინარებული 12 ბავშვი და მათი ფეხბურთი მწვრთნელი ცხრადღიანი ძებნის შემდეგ გამოქვაბულის სიღრმეში ბრიტანელმა მყვინთავებმა ცოცხლები იპოვეს. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

შაბათ საღამოს დაწყებულმა წვიმამ, რომელიც კვირას გაგრძელდა ტაილანდის ხელისუფლება აიძულა ოპერაცია ნაჩქარევად დაეწყო. სამაშველო ოპერაცია სრულ სიბნელეში სიარულს, ცოცვას, ცურვას და ყვინთვას გულისხმობს. მაშველებს და ბიჭებს სახეზე სპეციალური ნიღბები უკეთიათ, ასევე თან აქვთ ჟანგბადის ბოთლები. თითოეულ ბიჭს ორი მაშველი აცილებს. ამ დროისთვის სამაშველო ოპერაცია შეჩერებულია და რამდენიმე საათში განახლდება.

ამავე თემაზე: