ტაილანდში სამაშველო ოპერაციით დღეს, 9 ივლისს გამოქვაბულიდან ოთხი ბავშვი გამოიყვანეს. ამ ეტაპისთვის გამოქვაბულში ოთხი მოზარდი და მათი მწვრთნელი გამოქვაბულში რჩებიან. როგორც ინფორმაცია ვრცელდება, დღეისათვის ოპერაცია დასრულდა.

გამოქვაბულიდან გამოყვანის შემდეგ თითოეული ბავშვი სასწრაფოს მანქანით ვერტმფრენთან მიიყვანეს, რომელმაც ისინი საავადმყოფოში გადააფრინა.

წინა დღეს, რვა ივლისს დაიწყო სამაშველო ოპერაცია და პირველ ეტაპზე ოთხი ბავშვი გამოიყვანეს გამოქვაბულიდან. ამ დრომდე უცნობია გადარჩენილი მოზარდების ვინაობა. როგორც ექიმები ამბობენ, მათი ჯანმრთელობის მდგომარეობა დამაკმაყოფილებელია, ჯერჯერობით მოზარდებს ოჯახის წევრები არ უნახავთ. ექიმების თქმით, ოჯახის წევრებს მათი ნახვა და მათთან საუბარი შეეძლებათ, თუმცა სანამ სისხლის ანალიზის პასუხი არ იქნება ცნობილი მათი შეხება და ჩახუტება აკრძალულია.

23 ივნისს გამოქვაბულში გაუჩინარებული 12 ბავშვი და მათი ფეხბურთი მწვრთნელი ცხრადღიანი ძებნის შემდეგ გამოქვაბულის სიღრმეში ბრიტანელმა მყვინთავებმა ცოცხლები იპოვეს. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

შაბათ საღამოს დაწყებულმა წვიმამ, რომელიც კვირას გაგრძელდა ტაილანდის ხელისუფლება აიძულა ოპერაცია ნაჩქარევად დაეწყო. სამაშველო ოპერაციაში სულ 13 უცხოელი და 5 ტაილანდელი მყვინთავი მონაწილეობს.

სამაშველო ოპერაცია სრულ სიბნელეში სიარულს, ცოცვას, ცურვას და ყვინთვას გულისხმობს. მაშველებს და ბიჭებს სახეზე სპეციალური ნიღბები უკეთიათ, ასევე თან აქვთ ჟანგბადის ბოთლები. თითოეულ ბიჭს ორი მაშველი აცილებს. ამ დროისთვის სამაშველო ოპერაცია შეჩერებულია და რამდენიმე საათში განახლდება.