სახელმწიფო უსაფრთხოების სამსახურის პრესსამსახურის ინფორმაციით, კონტრტერორისტულმა ცენტრმა ტერორისტული აქტის ჩადენის მუქარის ფაქტზე ახმეტის რაიონის სოფ. დუისში მცხოვრები, 1993 წელს დაბადებული ვახტანგ ხ. დააკავა.

სუსის ცნობით, გამოძიებამ დაადგინა, რომ დაკავებულმა 2016 წლის 29 ივლისს ფეისბუკში, ყალბი მომხმარებლის სახელით გაავრცელა მუქარის შემცველი ინფორმაცია.

"აღნიშნულ ფაქტზე სუსის კონტრტერორისტულ ცენტრში დაუყონებლივ დაიწყო გამოძიება საქართველოს სსკ-ის 323-ე მუხლის I პრიმა ნაწილით და იმავე დღეს დადგინდა ინტერნეტ-სივრცეში გავრცელებული ტერორისტული აქტის ქმედების ჩადენის მუქარის ავტორი" - აცხადებს სახელმწიფო უსაფრთხოების სამსახური.

სამართალდამცავებმა დაკავებულის ავტომანქანა და საცხოვრებელი მისამართი გაჩხრიკეს. უწყების ინფორმაციით, დაკავებულმა აღიარა დანაშაული.

გამოძიება ტერორისტული აქტის ჩადენის მუქარის ფაქტზე მიმდინარეობს, საქართველოს სსკ-ის 323-ე მუხლის I პრიმა ნაწილით, რაც თავისუფლების აღკვეთას 6-დან 12 წლამდე ითვალისწინებს.

ფეისბუკის ერთ-ერთმა მომხმარებელმა 28 ივლისს გამოაქვეყნა აფეთქების ფოტო, რომელსაც რუსულად მიაწერა "ხვალ, 12:30-ზე, თბილისში ფეიერვერკი".

მუქარის შემცველი ფეისბუკ პოსტი ამ დროისათვის ხელმისაწვდომი არ არის. მომხარებელს საჯაროდ ატვირთული აქვს ტერორისტული ორგანიზაცია ისლამური სახელმწიფოს ქართველი მებრძოლის, თარხან ბათირაშვილის ორი ფოტო. სხვა საჯარო აქტივობა მის გვერდზე ხელმისაწვდომი არ არის. აღნიშნულ პირს ფეისბუკზე 37 მეგობარი ჰყავს, რომელთა ნაწილს მთავარ ფოტოდ დაჯგუფება ისლამური სახელმწიფოს დროშა აქვს დაყენებული.

ამავე თემაზე: