სახელმწიფო უსაფრთხოების სამსახურის ინფორმაციით, ფეისბუკზე მუქარის შემცველი ფოტოსა და ტექსტის გამოქვეყნების შემდეგ გამოძიება დაწყებულია.

როგორც On.ge-ს უწყებაში განუცხადეს, აღნიშნულთან დაკავშირებით უსაფრთხოების სამსახური ყველა საჭირო ინფორმაციას ფლობს. სუს-ში აცხადებენ, რომ ინფორმაციის გავრცელებისთანავე კონტრტერორისტულმა დეპარტამენტმა დაუყოვნებლივ დაიწყო გამოძიება.

მათივე თქმით, საგამოძიებო მოქმედებებისა და სხვა დეტალების შესახებ ინფორმაცია მოგვიანებით გავრცელდება. შემთხვევა გუშინ საღამოს მოხდა.

ფეისბუკის ერთ-ერთმა მომხმარებელმა გამოაქვეყნა აფეთქების ფოტო, რომელსაც რუსულად მიაწერა "ხვალ, 12:30-ზე, თბილისში ფეიერვერკი".

მუქარის შემცველი ფეისბუკ პოსტი ამ დროისათვის ხელმისაწვდომი არ არის. მომხარებელს საჯაროდ ატვირთული აქვს ტერორისტული ორგანიზაცია ისლამური სახელმწიფოს ქართველი მებრძოლის, თარხან ბათირაშვილის ორი ფოტო. სხვა საჯარო აქტივობა მის გვერდზე ხელმისაწვდომი არ არის. აღნიშნულ პირს ფეისბუკზე 37 მეგობარი ჰყავს, რომელთა ნაწილს მთავარ ფოტოდ დაჯგუფება ისლამური სახელმწიფოს დროშა აქვს დაყენებული.