გარემოს ეროვნული სააგენტოს ინფორმაციით, მიუხედავად ღამით მოსული უხვი ნალექისა, სოფელ ჭუბერში მდინარის დონემ დაახლოებით 30-სმ-მდე დაიწია. უწყების ცნობით, მათ მდინარეზე წყლის დონის გაზომვები განახორციელეს.

გარემოს ეროვნულ სააგენტოში ამბობენ, რომ დღეს, 7 ივლისს მოსალოდნელია საშუალო ინტენსივობის ნალექი, შემდეგ დღეებში კი კიდევ უფრო მკვეთრად შესუსტდება.

5 ივლისს უხვი ნალექის შედეგად სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარესამყაროს მოწყვიტა, უხვმა ნალექმა ჩამორეცხა სოფლებს შორის დამაკავშირებელი საავტომობილო გზები.