დიდი ბრიტანეთის ანტი-ტერორისტულმა საგამოძიებო ჯგუფმა განაცხადა, რომ წყვილი, რომელიც ინგლისის სამხრეთ-დასავლეთით მდებარე პატარა ქალაქში იპოვეს, იგივე ნერვო-პარალეპტიკური ნივთიერებით, ნოვიჩოკითაა მოწამლული, რითიც ყოფილი რუსი აგენტი, სერგეი სკრიპალი და მისი ქალიშვილი.

BBC-ის ცნობით, ჩარლი როული და დონ შტურგესი კრიტიკულ მდგომარეობაში, საავადმყოფოში გადაიყვანეს მას შემდეგ, რაც უგუნოდ მყოფები, საკუთარ სახლში აღმოაჩინეს.

პოლიციის განცხადებით, ორივე მათგანი ბრიტანელია და მათ წარსულში ვერაფერი იპოვეს საეჭვო, რომ მათი განზრახ მოწამვლა ევარაუდათ. სამართალდამცავების განცხადებით, ჯერჯერობით უცნობია, საიდან შევიდა მომწამვლელი ნივთიერება.

ყოფილი რუსი ჯაშუში, სერგეი სკრიპალი და მისი შვილი იულია, ბრიტანეთის ქალაქ სოლსბერიში 4 მარტს მოწამლეს. ბრიტანეთის პრემიერ-მინისტრმა, ტერეზა მეიმ სკრიპალების მოწამვლის საქმეში რუსეთი დაადანაშაულა. მეის განმარტებით, რუსეთმა მოსაწამლად ნერვო-პარალეპტიკური ნივთიერება ნოვიჩოკი გამოიყენა.

განცხადებიდან მალევე მეიმ თქვა, რომ ქვეყნიდან 23 რუს დიპლომატს გააძევებდა. ბრიტანეთის გადაწყვეტილებას შეუერთდა აშშ და ევროკავშირის წევრი სახელმწიფოების უმეტესობა.

ამ დროისთვის, სხვადასხვა ქვეყნებიდან გაძევებული რუსი დიპლომატების რიცხვი 150 ადამიანს გაუტოლდა. რუსეთმა ბრალდებები უარყო და საპასუხოდ სხვადასხვა ქვეყნის დიპლომატების გაძევება დაიწყო.