ხორავას ქუჩის საქმეზე შექმნილ საგამოძიებო კომისიაზე რეკომენდაციების განხილვას ხმაური მოჰყვა. ევროპული საქართველოს დეპუტატების ინიციატივით, შსს-მ უნდა გამოიძიოს ხორავას ქუჩაზე კიდევ ერთი პირის გ.მ. დაჭრის ფაქტი.

აღნიშნულ რეკომენდაციას ქართული ოცნების დეპუტატების ეწინააღმდეგებიან. კომისიის წევრის არჩილ თალაკვაძის თქმით, გ.მ.- ს დაჭრის ფაქტზე გამოძიების დაწყების მოთხოვნა ღია კარის მტვრევაა, რადგან ამ საქმეს შესაბამისი უწყებები ისედაც იძიებენ. მისი თქმით, გამოყოფილია საქმე, რომლის ფარგლებში გ.მ. ჯანმრთელობის დაზიანების საქმეს იძიებენ.

არჩილ თალაკვაძეს ევროპული საქართველოს დეპუტატი ხათუნა გოგორიშვილი გამოეხმაურა და არჩილ თალაკვაძეს უზუსტობაზე მიანიშნა.

გოგორიშვილის განმარტებით, გამოყოფილი საქმე დანაშაულის დაფარვის ნაწილს მოიცავდა და არ ეხებოდა გ.მ.-ს დაჭრის ფაქტს.

აღნიშნულ განცხადებას თალაკვაძესა და გოგორიშვილს შორის კამათი მოჰყვა. კომისიის თავმჯდომარემ, სერგი კაპანაძემ დეპუტატებს საგამოძიებო კომისიის ქცევის წესები შეახსენა.

"როდესაც კომისიის წევრი საუბრობს, კომისიის სხვა წევრები არიან ჩუმად. როცა ამთავრებს პასუხს, შემდეგ ითხოვს სხვა სიტყვას და მე მიკროფონს ვურთავ. ნუ გვექნება აქ ბალაგანი, ხალხი გვიყურებს", - განაცხადა სერგი კაპანაძემ.

ხორავას ქუჩის საქმეზე შექმნილი საგამოძიებო კომისიის თავმჯდომარე სერგი კაპანაძე შსს-ს მოუწოდებს, დაიწყოს გამოძიება ხორავას ქუჩაზე, პირველ დეკემბერს მოზარდ გ.მ.-ს ცივი იარაღით დაჭრის ფაქტზე. სერგი კაპანაძის განცხადებით, საგამოძიებო კომისიაში განხილული საქმის მასალებიდან გაირკვა, რომ ხორავას ქუჩაზე, გარდა ორი მოკლული მოზარდისა დაზიანდა ერთი მოზარდი - გ.მ.