13 ივნისის სტიქიიდან სამი წლის შემდეგ წყნეთი-ბეთანიის გზა გაიხსნა. ინფრასტრუქტურის სამინისტროს განცხადებით, ახალი გზა უსაფრთხოების ნორმებითაა აღჭურვილი:

  • გაკეთდა სპეციალური ბადეები, რომელიც აჩერებს დიდი ინერციით მოძრავ ლოდებს;
  • დამონტაჟდა წინასწარი შეტყობინების სისტემები, რომელიც ქანების გადაადგილებაზე სიგნალს გადასცემს გზის შემოსასვლელში და გასასვლელში დაყენებულ შლაგბაუმებს და ისინი ავტომატურად დაიკეტება;
  • მშენებლობის პროცესში გამოკვლეული იქნა დამეწყრილი ფერდობის საიმედოობის კოეფიციენტი, რომელშიც მოიაზრება სეისმური ბიძგები 8 ბალზე და ჰიდროლოგიური წნევები. მოხდა კვლევის შედეგად გამოვლენილი საეჭვო ზონების დაბურღვა და ქანების ანკერული გამაგრება.

2015 წლის 13 ივნისის სტიქიის დროს დანგრეული გზის აშენებას 14 თვე დასჭირდა და თითქმის 26 მილიონი ლარი დაჯდა. ძირითად სამუშაოებს კომპანია კავკაზუს როუდ პროჯექტი ახორციელებდა.

თავდაპირველად, გზის გახსნა მიმდინარე წლის 13 ივნისს, სტიქიის სამი წლის თავზე იყო დაგეგმილი, თუმცა, მუნიციპალური განვითარების ფონდში განაცხადეს, რომ წვიმიანი ამინდის გამო გახსნა რამდენიმე კვირით გადაიდო. შემდეგ გზა 29 ივნისს უნდა გახსნილიყო, თუმცა ამჯერადაც იმავე მიზეზით გადაიდო. როგორც On.ge-ს რეგიონული განვითარებისა და ინფრასტრუქტურის სამინისტროში უთხრეს, გზა 2 ივლისს უნდა გახსნილიყო.