მუნიციპალური განვითარების ფონდმა ორი კვირის წინ დააანონსა, რომ წყნეთი-ბეთანიის გზა 29 ივნისს გაიხსნებოდა. დღეს გაირკვა, რომ გახსნის ცერემონია სამი დღით გადაიდო და გზა 2 ივლისს, დღის პირველ ნახევარში გაიხსნება. ამის შესახებ ინფორმაცია On.ge-ს მუნიციპალური განვითარების ფონდსა და რეგიონული განვითარებისა და ინფრასტრუქტურის სამინისტროში დაუდასტურეს.

რეგიონული განვითარებისა და ინფრასტრუქტურის სამინისტროში On.ge-ს განუცხადეს, რომ გზის გასახსნელად მცირე სამუშაოებია დარჩენილი, რომელსაც ხელი ძლიერმა წვიმებმა შეუშალა.

"ვალდებულება, რომ გზა აუცილებლად 29 ივნისს უნდა გახსნილიყო, როგორც ვიცი, არ არსებობს", - განუცხადეს On.ge-ს უწყების პრესსამსახურში.

თავდაპირველად, გზის გახსნა მიმდინარე წლის 13 ივნისს, სტიქიის სამი წლის თავზე იყო დაგეგმილი, თუმცა, როგორც 29 ივნისს, მაშინაც მუნიციპალური განვითარების ფონდში განაცხადეს, რომ წვიმიანი ამინდის გამო, გზის გახსნა რამდენიმე კვირით გადაიდო.

2015 წლის 13 ივნისის სტიქიის დროს დანგრეული გზის აშენებას 14 თვე დასჭირდა და თითქმის 26 მილიონი ლარი დაჯდა. ძირითად სამუშაოებს კომპანია „კავკაზუს როუდ პროჯექტი“ ახორციელებს. 2 ივლისს გზას ერთობლივად გახსნიან ინფრასტრუქტურის მინისტრი მაია ცქიტიშვილი, თბილისის მერი კახა კალაძე, საქართველოს პრემიერ-მინისტრი მამუკა ბახტაძე და ევროპის საინვესტიციო ბანკის წარმომადგენლები.