ჟურნალისტ ინგა გრიგოლიას თქმით, პირმა, რომელიც მასზე მუქარის შემცველი შეტყობინებების გამო დააკავეს ისევ დაურეკა. ამის შესახებ ჟურნალისტმა ფეისბუქგვერდზე დაწერა.

გრიგოლიას განცხადებით, აღნიშნულმა პირმა ფსიქიატრიულის თანამშრომლის ნომრიდან დაურეკა. მისი თქმით, როდესაც ადვოკატმა პროკურატურაში სცადა გარკვევა უთხრეს, რომ ამ დრომდე არ გადაუგზავნიათ დადგენილება იმის შესახებ, რომ მოძალადეს ზარების უფლება შეზღუდვოდა.

გრიგოლიას მიაჩნია, რომ პროკურატურამ მიზანმიმართულად არ შეუზღუდა აღნიშნულ პირს დარეკვის უფლება იმისთვის, რომ მასზე ფსიქოლოგიური ზემოქმედება მოეხდინათ:

"არც ერთი წამით აღარ მჯერა,რომ ეს კაცი შემთხვევით გადამეკიდა. გუშინწინ მქონდა ძალიან მძიმე გადაცემა ხორავას ქუჩის მკვლელობაზე, პროკურატურის მძაფრი კრიტიკით და დღეს უცებ დაარეკინეს ფსიქიატრიულიდან ამ მანიაკს და დღეს პროკურატურა ამბობს, რომ თურმე აქამდე ზარების შეზღუდვა არ აუკრძალავთ."

როგორც On.ge-ს პროკურატურაში უთხრეს ამ ეტაპზე ამბავს არკვევენ და დეტალები მოგვიანებით გახდება ცნობილი.

ინგა გრიგოლიას მიმართ მუქარის საქმე

გრიგოლიას თქმით, მის ტელეფონზე ზარები და შეტყობინებები 2011 წლიდან შედის, ურეკავდა კაცი, რომელიც მაშინ ციხეში იყო და ეუბნება, რომ მისი შვილის მამაა (მისი შვილის მამა გარდაცვლილია). როგორც ჟურნალისტი ყვება, ეს კაცი ციხიდან 2013 წლის საყოველთაო ამნისტიის დროს გამოვიდა და გააგრძელა მასთან დარეკვა.

პირს, რომელიც ჟურნალისტ გრიგოლიას ემუქრებოდა, პროკურატურამ ბრალი ადევნებისა და მუქარის საქმეზე წარუდგინა და აღმკვეთი ღონისძიების სახით პატიმრობა შეეფარდა. წარდგენილი ბრალდება სასჯელის სახედ და ზომად 2 წლამდე თავისუფლების აღკვეთას ითვალისწინებს. ბრალდებული მოგვიანებით ფსიქიატრიულ დაწესებულებაში გადაიყვანეს.

უწყების განცხადებით, გამოძიებით დადგინდა, რომ ბრალდებულმა ინგა გრიგოლიასთან, მისთვის არასასურველი კომუნიკაცია დაამყარა, დაადგინა მისი მობილური ტელეფონის ნომერი, სამსახურის მისამართი და დაუწყო უკანონო თვალთვალი. გამოძიების ინფორმაციით, ბრალდებული სისტემატიურად ურეკავდა ტელეფონზე, სთხოვდა შეხვედრას, აკითხავდა სამსახურთან და საცხოვრებელ სახლთან, უგზავნიდა მოკლე ტექსტურ შეტყობინებებს და ხელნაწერ წერილებს, სთხოვდა თითქოსდა საერთო შვილის ჩვენებასა და ვითომდა მითვისებული ქონების დაბრუნებას.

პროკურატურის ცნობით, დაკავებული ტელეწამყვანზე სისტემატიურ ფსიქოლოგიურ ზეწოლას ახორციელებდა, ემუქრებოდა ჯანმრთელობისა და ქონების დაზიანებით.