საპარლამენტო უმრავლესობის წევრი დავით ჭიჭინაძე ფიქრობს, რომ იუსტიციის მინისტრს თეა წულუკიანს, თანამდებობის დატოვების შემდეგ უფრო შეეძლება მმართველი გუნდის კრიტიკა. ამის შესახებ ჭიჭინაძემ მთავრობის სტრუქტურულ ცვლილებებთან დაკავშირებით კონსულტაციების დასრულების შემდეგ გააკეთა.

"ამ ადამიანმა, როდესაც კვირიკაშვილმა დატოვა თანამდებობა, შემდეგ მიუთითა შეცდომებზე. ამ გადასახედიდან, ქართულ ოცნებასაც თუ რამე შეცდომები აქვს, გარედან უფრო კარგად დაინახავს ეს ქალბატონი", - განაცხადა ჭიჭინაძემ.

თეა წულუკიანის გადადგომის მოთხოვნა დღის წესრიგში მას შემდეგ დადგა, რაც ყოფილ მთავარ პროკურორს ირაკლი შოთაძეს იუსტიციის მინისტრმა გაწეული საქმიანობისთვის მადლობა გადაუხადა და მხარდაჭერა აღუთქვა, მიუხედავად იმისა, რომ შოთაძის გადადგომის მიზეზი ხორავას ქუჩის საქმეზე გამოტანილი განაჩენი იყო. არასამთავრობოების მოთხოვნას ყოფილი პრემიერი გიორგი კვირიკაშვილი გამოეხმაურა, წულუკიანის გადადგომის მოთხოვნას აბსურდული უწოდა და არასამთავრობო სექტორი პოლიტიკურ დღის წესრიგში დაადანაშაულა.

ამ პროცესების შემდეგ, მოქალაქეების ნაწილმა იუსტიციის სამინისტროსთან აქცია გამართა სახელწოდებით: "თეა წადი". არასამთავრობოებისა და მოქალაქეების პოზიცია გაიზიარა საქართველოს პრეზიდენტმა გიორგი მარგველაშვილმა და განაცხადა, რომ წულუკიანის გადადგომის მოთხოვნა ლეგიტიმური იყო. თავად წულუკიანმა კი განაცხადა, რომ თანამდებობას მხოლოდ გუნდის გადაწყვეტილების საფუძველზე დატოვებს.

პრემიერ-მინისტრობის კანდიდატად დასახელების შემდეგ მამუკა ბახტაძემ განაცხადა, რომ პრიორიტეტი მცირე მთვარობა იქნება. ამ ეტაპზე სამთავრობო ცვლილებებზე კონსულტაციები დამთავრებულია, თუმცა ჯერ კიდევ უცნობია რომელი სამინისტროები გაუქმდება ან გაერთიანდება. ასევე, უცნობია, მინისტრთა კაბინეტის სამომავლო ახალი შემადგენლობა.

თვითონ წულუკიანმა კი განაცხადა, რომ მისთვის სულერთია იქნება თუ არა მინისტრთან კაბინეტში, რადგან ის ქართული ოცნების გუნდურ მოთამაშედ მაინც რჩება.