ომბუდსმენი, ნინო ლომჯარია მიიჩნევს, რომ ხორავას ქუჩის საქმეზე შექმნილ საგამოძიებო კომისიას გაურთულდება მკვლელობაში მონაწილე პირების დადგენა, რადგან მნიშვნელოვანი მტკიცებულებების ნაწილი ამოღებული არ არის.

ლომჯარიას აზრით, საქმის გამოძიება მხოლოდ ჩვენებებზე დაყრდნობით რთული იქნება. ამასთან, ომბუდსმენი საქმეში მონაწილე ყველა პირის პასუხისმგებლობის საკითხზე საუბრობს.

"ყველა იმ პირის პასუხისმგებლობის საკითხი უნდა დადგეს, მიუხედავად მათი თანამდებობრივი სიმაღლისა, ვინც შეიძლება იცოდა, ან ხელს უწყობდა, ან ხელს აფარებდა გარკვეული ინტერესების გატარებას ამ საქმეში, რა თქმა უნდა, სახალხო დამცველი არ დაიხევს უკან თუ ასეთი რამ გამოიკვეთა", - განაცხადა ლომჯარიამ ჟურნალისტებთან საუბრისას.

ხორავას ქუჩაზე მომხდარ მკვლელობაზე პარლამენტში ევროპული საქართველოს ინიციატივით საგამოძიებო კომისია შეიქმნა. კომისიაში უმრავლესობას საპარლამენტო უმცირესობა წარმოადგენს.

დღეს, 22 ივნისს კომისიის წევრები უკვე შეხვდნენ მოკლული დავით სარალიძის მამას, ამ წუთებში კი ლევან დადუნაშვილის ოჯახის გამოკითხვა მიმდინარეობს.