საქართველოს სახალხო დამცველის აპარატი სრულად გაეცნო ხორავას საქმის განაჩენს და აცხადებს, რომ განაჩენმა გამოძიებაში არსებული ხარვეზები გამოკვეთა. ომბუდსმენის თქმით, პროკურატურამ ვერ უზრუნველყო დავით სარალიძის მკვლელობაში მონაწილე ყველა პირის დამნაშავედ ცნობისთვის საკმარისი მტკიცებულებების მოპოვება.

ნინო ლომჯარიას განცხადებით, განაჩენი დასაბუთებულია და კანონის დაცვით არის მიღებული:

"მასში გაანალიზებულია ადამიანის უფლებათა ევროპული სასამართლოს პრაქტიკა და პარალელურად, ყველა სამართლებრივი საკითხი საქართველოს უზენაესი სასამართლოს სამართალწარმოების პრაქტიკის შესაბამისად არის გადაწყვეტილი."

ომბუდსმენის განცხადებით, ამ საქმემ სკოლაში ბავშვთა ბულინგისა და ძალადობის დაცვის ეფექტიანი მექანიზმის არარსებობა გამოაჩინა.მისი თქმით, სკოლაში ბავშვთა უსაფრთხოებაზე პასუხისმგებელი პირების მიერ დაკისრებული მოვალეობების ეფექტიანი შესრულება სისტემური რეფორმის გატარებას მოითხოვს, რათა სამომავლოდ არასრულწლოვნებს შორის ძალადობა მინიმუმამდე შემცირდეს.