თავდაცვის მინისტრობის კანდიდატის, ლევან იზორიას თქმით, ჯაველინების შემდეგ, საქართველო აშშ-სგან ანტისაჰაერო თავდაცვით სისტემებს - სტინგერებს მიიღებს. ამის შესახებ თავდაცვის მინისტრობის კანდიდატმა პარლამენტში, 19 ივნისს კომიტეტების გაერთიანებულ სხდომაზე სიტყვით გამოსვლისას განაცხადა.

იზორიამ აღნიშნა, რომ თავდაცვის სფეროში განხორციელებული სწორი პოლიტიკის აღიარებაზე აშშ-ს მხარდაჭერა კიდევ ერთხელ მიუთითებს. გამოსვლისას ახალი სისტემის გადმოცემის ვადებსა და შესყიდვაზე იზორიას არაფერი უთქვამს.

სტინგერი პორტატული საზენიტო-სარაკეტო სისტემაა, რომელიც დაბალ სიმაღლეზე მფრინავი ობიექტების გასანადგურებლად შეიქმნა. გარდა ამისა, ის უზრუნველყოფს არაბრონირებული ზედაპირის მქონე სახმელეთო და საზღვაო ობიექტების დაბომბვას.

ერთი ერთეული სისტემის შეძენა 60-70 ათასი დოლარი ჯდება. მონაცემებით, სისტემის დაფარვის მაქსიმალური მანძილი 8 კილომეტრია, მაქსიმალური სიმაღლე კი 3,8 კილომეტრი.