სექსუალურ შევიწროებაში დადანაშაულებული ზვიად დევდარიანი ადასტურებს, რომ სარჩელი პატივის, ღირსების და საქმიანი რეპუტაციის შელახვისა და მიყენებული მორალური ზიანის ანაზღაურებასთან დაკავშირებით, სამართლომ არ მიიღო წარმოებაში. ამის შესახებ ზვიად დევდარიანის მიერ გავრცელებულ განცადებაშია ნათქვამი.

მისი თქმით, შესაბამისი განჩინებით განემარტა, თუ რა ფაქტობრივი და სამართლებრივი გარემოებები უნდა დაზუსტდეს იმისთვის, რომ სარჩელი წარმოებაში იქნას მიღებული.

"ამაში უცნაური არაფერია, მით უფრო პრეცედენტულ საქმეში, რადგან ნებისმიერი სარჩელი შეიძლება მოითხოვდეს დაზუსტებას და ეს წმინდა პროცედურული საკითხია - სარჩელი შესაბამისობაში მოვა განჩინებაში მოყვანილ მითითებებთან და იქნება მიღებული წარმოებაში", - აცხადებს ზვიად დევდარიანი.

ზვიად დევდარიანის აზრით, საგანგაშოა ის ფაქტი, რომ სარჩელის წარმოებაში მიღების საკითხი უფრო ადრე გახდა ცნობილი სავარაუდო მოპასუხეებისთვის (წინა დღით), ვიდრე მოსარჩელისთვის. რაც, დევდარიანის აზრით, ნიშნავს იმას, რომ სასამართლოს მხრიდან უკანონოდ იქნა მიწოდებული ინფორმაცია გარკვეული პირებისთვის.

"შემდგომში მსგავსი უხერხულობის თავიდან აცილების მიზნით, მოვუწოდებთ თბილისის საქალაქო სასამართლოს, მეტი ყურადღება გამოიჩინოს ინფორმაციის გაცემისას და იმოქმედოს კანონით დადგენილ ფარგლებში. წინააღმდეგ შემთხვევაში, მსგავსი ფაქტები გვაფიქრებინებს, რომ სასამართლო დაინტერესებულია საქმის შედეგით და რაც მის ობიექტურობაში ეჭვის შეტანის საფუძველს წარმოშობს", - ნათქვამია განცხადებაში.

ზვიად დევდარიანმა პატივისა და ღირსების შელახვის მოტივით 12 პირის წინააღმდეგ შეიტანა სასამართლოში სარჩელი. დევდარიანის ადვოკატმა, დიმიტრი გაბუნიამ განაცხადა, რომ 12 პირიდან მხოლო რვა პირის ვინაობას დაასახელებენ, ხოლო მისი თქმით, სავარაუდო მსხვერპლების ვინაობას არ გაამხელენ.

ზვიად დევდარიანმა უჩივლა:

• ბაია პატარაიას - კავშირ საფარის ხელმძღვანელი;
• იდა ბახტურიძეს - ქალთა მოძრაობის წევრი;
• თამარ ჩერგოლეიშვილს - ონლაინგამოცემა ტაბულას დირექტორი;
• ნინო დანელიას - ილიაუნის პროფესორი;
• თამარ ყურაშვილს;
• თამარ კაკაბაძეს - ევროპული საქართველოს წევრი;
• ეკატერინე ონიანსა;
• გამოცემა ტაბულას.

17 მარტს ქალთა მოძრაობამ ომბუდსმენის მიერ წარდგენილი სამეურვეო საბჭოს კონკურსის ერთ-ერთი მონაწილე ზვიად დევდარიანი სექსუალურ შევიწროების 10-მდე შემთხვევაში დაადანაშაულა, რის შემდეგაც დევდარიანმა საკუთარი კანდიდატურა მოხსნა.