პატრიოტთა ალიანსის ლიდერმა, ირმა ინაშვილმა პარლამენტში გარდამავალი მთავრობის წევრებთან შეხვედრის დროს განაცხადა, რომ მინისტრობის კანდიდატებს დამატებით კითხვებს არ დაუსვამს.

მისი თქმით, ის ყველა მინისტრობის კანდიდატის საქმიანობას იცნობს და მხოლოდ მაშინ შევლენ დისკუსიაში, როდესაც რეალური მთავრობა იქნება წარმოდგენილი.

"პრაქტიკულად ყველა მინისტრის საქმიანობას ვიცნობთ და მე რომ გავიდე ახლა ტრიბუნასთან, იმ მინისტრის მაგივრად მეც კი შემიძლია მოგიყვეთ, რას აპირებს იმ სფეროში ეს მინისტრი.", - ამბობს ინაშვილი.

ირმა ინაშვილის განმარტებით, პატრიოტთა ალიანსი არც გარდამავალი მთავრობის დამტკიცების კენჭისყრაში მიიღებს მონაწილეობას, რადგან მიაჩნია, რომ ტექნიკურ მთავრობაზე პასუხისმგებლობა უმრავლესობამ უნდა აიღოს.

"ჩვენ პასუხისმგებლობას ავიღებთ უკვე იქიდან გამომდინარე თუ რას მოვისმენთ სამი კვირის შემდეგ პარლამენტის სხდომათა დარბაზში", - განაცხადა ირმა ინაშვილმა.

საქართველოს პარლამენტში გაერთიანებული კომიტეტების სხდომა, სადაც გარდამავალი მთავრობის მინისტრობის კანდიდატებს უსმენდნენ დასრულდა. საკომიტეტო მოსმენების დასრულების შემდეგ, გარდამავალ მთავრობას საპარლამენტო პოლიტიკური პარტიების ფორმატში უსმენენ.

ძველი მთავრობისა და ახალი პრემიერის დამტკიცების შემდეგ, პარლამენტი სტრუქტურულ ცვლილებებს განახორციელებს, რაც იმას ნიშნავს, რომ სამინისტროების რაოდენობა 14-დან 11-მდე შემცირდება და უკვე სამი კვირის შემდეგ, მამუკა ბახტაძე განახლებულ მთავრობას წარადგენს.