თბილისში, მოდულის შენობასთან პანკისში სპეცოპერაციის შედეგად გარდაცვლილი თემირლან მაჩალიკაშვილის მამის, მალხაზ მაჩალიკაშვილის მხარდასაჭერი აქცია #ნუმომკლავ მიმდინარეობს.

პარალელურად, სპეცოპერაციის დროს გარდაცვლილი თემირლან მაჩალიკაშვილის მამა, მალხაზ მაჩალიკაშვილი და მისი მხარდამჭერები პანკისში საპროტესტო აქციას მართავენ.

მოძრაობის #ნუმომკლავ ერთ-ერთი წევრი, ტიტე გედენიძე ამბობს, რომ პანკისელების სოლიდარობის ნიშნად მოძრაობა აქციას მართავს მოდულის შენობასთან. აქციაზე მისული ადამიანები ამბობენ, რომ თემირლან მაჩალიკაშვილი სისტემის მსხვერპლია.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო.