იუსტიციის მინისტრის მოვალეობის შემსრულებლის, თეა წულუკიანის თანამდებობიდან გადადგომის მოთხოვნით, პეტიცია შეიქმნა.

პეტიციაში ჩამოთვლილია შვიდი პუნქტი, რის გამოც პეტიციის ავტორი, საქართველოს დემოკრატიული ინიციატივის იურისტი გიორგი მშვენიერაძე წულუკიანის გადადგომას ითხოვს:

  • თეა წულუკიანი პირადად არის პასუხისმგებელი სამართალდამცავ სისტემაში განუხორციელებელ რეფორმებზე, რომლებსაც წლებია მოითხოვს საზოგადოება და რომლებსაც უნდა მოჰყოლოდა პროკურატურის, შინაგან საქმეთა სამინისტროსა და სახელმწიფო უსაფრთხოების სამსახურის ძირეული ინსტიტუციური გარდაქმნა და დამოუკიდებელი საგამოძიებო მექანიზმის შექმნა;
  • თეა წულუკიანი პირადად არის პასუხისმგებელი მართლმსაჯულების სისტემაში განუხორციელებელ რეფორმაზე, რომლის შედეგად სასამართლო სისტემაში მივიღეთ კლანური მმართველობა, ხოლო სასამართლოსადმი ნდობა დღითიდღე იკლებს;
  • თეა წულუკიანი პირადად არის პასუხისმგებელი სხვადასხვა დროს კბილაშვილის, ფარცხალაძის, ბადაშვილისა და შოთაძის მთავარი პროკურორის თანამდებობაზე დანიშვნაზე და პოლიტიკურად პასუხისმგებელი მათ უვარგის საქმიანობაზე;
  • თეა წულუკიანი პირადად არის პასუხისმგებელი თანამშრომლების უკანონო გათავისუფლებაზე, მათ აღსადგენად სასამართლოს გადაწყვეტილების აღუსრულებლობასა და უპატივცემულობაზე;
  • თეა წულუკიანი პირადად არის პასუხისმგებელი იმაზე, რომ საჯარო რეესტრის ეროვნულ სააგენტოს ხელმძღვანელობდა თანამშრომლებზე სექსუალურად მოძალადე პაპუნა უგრეხელიძე. მან იცოდა ამ ძალადობის შესახებ, მაგრამ სანამ მწვავე საზოგადოებრივი რეაქცია არ მიიღეს, ერთი წელი უარს აცხადებდა მის გათავისუფლებაზე. სწორედ ამ საქმის გამოა ფუჭი ყველა ის ინიციატივა თუ განცხადება, რომელიც ქალთა უფლებების დასაცავად მას წამოუყენებია ან გამოუთქვამს;
  • თეა წულუკიანი პირადად არის პასუხისმგებელი ქსენოფობიის და სიძულვილის თესვაზე, ამიტომ ფუჭია დისკრიმინაციის წინააღმდეგ მის მიერ გაკეთებული განცხადებები თუ გადადგმული ნაბიჯები;
  • თეა წულუკიანი პირადად არის პასუხისმგებელი ადამიანის უფლებათა ევროპული სასამართლოს მოსამართლის შესარჩევი კონკურსის სამარცხვინოდ ჩატარებაზე.

თეა წულუკიანის გადადგომის მოთხოვნით იუსტიციის სახლთან საპროტესტო აქცია გაიმართა. აქციის მონაწილეები პეტიციის პუნქტებზე დაყრდნობით მის გადადგომას ითხოვდნენ.

ასევე, სამოქალაქო აქტივისტების ნაწილმა იუსტიციის მინისტრის მოვალეობის შემსრულებელს გადადგომის მოთხოვნით ფლეშმობი #1000წერილითეას წამოიწყეს.

გაიგეთ მეტი: