ბათუმში აჭარის საზოგადოებრივი მაუწყებლის ჟურნალისტი კობა ფარტენაძე ადმინისტრაციული წესით დააკავეს. ინფორმაციას ადვოკატი თემურ ქავშბაია ავრცელებს. ჟურნალისტის დაკავების მიზეზი უცნობია.

ჟურნალისტის უფლებებს თემურ ქავშბაიას საადვოკატო ოფისი დაიცავს. ადვოკატის ცნობით, დაკავებული ამჟამად ზესტაფონის დროებითი დაკავების იზოლატორშია გადაყვანილი.

"დაკავებულია აჭარის ტელევიზიის ჟურნალისტი კობა ფარტენაძე. მისი დაკავება მოხდა ბათუმის საქალაქო სამმართველოს პოლიციის მე-2 განყოფილებაში. კობას ინტერესებს დაიცავს თემურ ქავშბაიას საადვოკატო ოფისი! ამ დროისათვის ვარკვევთ თუ რა საფუძვლითა და მოტივით იქნა, ადმინისტრაციული წესით დაკავებული კობა ფარტენაძე.

ამჟამად ის მოთავსებულია ზესტაფონის წინასწარი დაკავების იზოლატორში.
საზოგადოებას უახლოეს პერიოდში ვაცნობებთ საქმეზე მიღებულ გადაწყვეტილებასა და მიმდინარეობის შესახებ", — წერს ადვოკატი თემურ ქავშბაია.

ცნობისთვის გუშინ, 16 აგვისტოს მეტეოროლოგ კობა ფარტენაძეს, ბათუმში, ევროპის მოედანზე, კვლავ დაესხნენ თავს. ინფორმაციას "აჭარა თაიმსი" ავრცელებს.

მანამდე, აჭარის საზოგადოებრივი მაუწყებლის ჟურნალისტმა და მეტეოროლოგმა, კობა ფარტენაძემ, სოციალურ ქსელში ვიდეო გაავრცელა, სადაც ისმის, თუ როგორ ემუქრება უცნობი კაცი. ბათუმის საქალაქო სასამართლომ აჭარის საზოგადოებრივი მაუწყებლის ჟურნალისტ კობა ფარტენაძის მიმართ განხორციელებულ დაჭრის მუქარასა და ძალადობაში ბრალდებულ ორ პირს 7 000-7 000-ლარიანი გირაო შეუფარდა.