ყველამ იცოდა, რომ კრიშტიანუ რონალდუ და ჯორჯინა როდრიგესი დაქორწინებას აპირებდნენ, თუმცა არავინ იცოდა — როდის ან სად.

წყვილმა ერთი კვირის წინ Instagram-ზე საქორწინო ბეჭდების ფოტო გამოაქვეყნა. მოგვიანებით ცნობილი გახდა, რომ ქორწილი ვიწრო წრეში ჩატარდა. ცერემონია სამშაბათს, 11 აგვისტოს, 13:30 საათზე, კასკაისში, წყვილის სახლში, გაიმართა — ზუსტად ათი წლის შემდეგ, რაც ერთმანეთს მადრიდის Gucci-ის მაღაზიაში პირველად შეხვდნენ (სადაც ჯორჯინა კონსულტანტად მუშაობდა).

მათი სიყვარულის ისტორიის დასაწყისის გათვალისწინებით, გასაკვირი არ არის, რომ წყვილი ქორწილში სწორედ Gucci-ის სამოსში გამოეწყო.

"ამ მნიშვნელოვანი მომენტისთვის ჯორჯინასა და კრიშტიანუს შემოსვა განსაკუთრებული გრძნობა იყო, რადგან ვიცი, რომ მათი სიყვარულის ისტორია მადრიდის Gucci-ის მაღაზიაში დაიწყო," — განაცხადა Gucci-ის შემოქმედებითმა ხელმძღვანელმა, დემნამ — "ამაში არის რაღაც ძალიან რომანტიკული — თითქოს, თანამედროვე ზღაპარივით ლამაზი წრე შეიკრა."

ჯორჯინამ აღნიშნა, რომ დემნამ ზუსტად იგრძნო, რაც სურდათ: "არ მინდოდა, ჩვენთვის ასეთ უბრალო დღეს კოსტიუმებში გამოწყობილები შევხვედროდით.".

სტუმრების სია მაქსიმალურად შეზღუდული იყო: ხუთი შვილის გარდა, ცერემონიას მხოლოდ ოთხი ადამიანი ესწრებოდა: მიგელ პაიშაუ, ივანა როდრიგესი, ხოსე როდრიგეს სანხილი და მისი მეუღლე, მონიკა გონსალეს მარტინესი.

ჯორჯინას თქმით, ქორწილი ძალიან განსხვავდებოდა იმისგან, რაზეც ბავშვობაში ოცნებობდა:

"როდესაც პატარა ვიყავი, ყველაზე დიდ სასახლეზე, ყველაზე მდიდრულ ეტლზე, ყველაზე გრძელ კაბასა და ბრილიანტებით სავსე გვირგვინზე ვოცნებობდი. ახლა კი პირიქით — მინდა რაღაც ახლობლური, ჩემს პარტნიორთან და ჩვენს შვილებთან ერთად, სახლში. იმიტომ, რომ სასახლეები, სახლები, კუნძულები, ცხენები, მანქანები — ეს ყველაფერი ჩვენთვის ყოველდღიურად ხელმისაწვდომია. ასეთი ვიწრო, ოჯახური გარემო კი ბევრად უფრო იშვიათი და ძვირფასია," — გაანდო ჯორჯინამ Vogue-ს.

ფოტო: Juergen Teller