პატრიოტთა ალიანსის დეპუტატმა, ადა მარშანიამ ხორავას ქუჩის საქმეზე შექმნილი პარლამენტის დროებითი საგამოძიებო კომისია დატოვა. ამის შესახებ მან დღეს, 13 ივნისს განაცხადა.

დღეს პარლამენტის საგამოძიებო კომისიაში ტექნიკური საკითხებს განიხილავენ. ადა მარშანია, როგორც წინა სხდონმაზე, დღესაც ითხოვდა, რომ კომისიას სხვა გახმაურებული კრიმინალური საქმეებიც განეხილა და არამხოლოდ ხორავას ქუჩაზე არასრულწლოვნების მკვლელობა. კომისიის თავმჯდომარემ, სერგი კაპანაძემ დეპუტატს განუმარტა, რომ სხვა საქმეების ჩართვა კომისიის საქმიანობაში, შეუძლებელი იქნებოდა.

ადა მარშანიამ ასევე განაცხადა, რომ კომისიის შემადგენლობა რეგლამენტის დარღვევით დაკომპლექტდა.

ხორავას ქუჩის საქმეზე შექმნილმა საგამოძიებო კომისიამ პარლამენტში პირველი სხდომა 8 ივნისს გამართა.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.