პარლამენტის იურიდიული კომიტეტის თავმჯდომარე ეკა ბესელია ითხოვს, რომ დაკონკრეტდეს ის ფრაზა, რომელიც ზაზა სარალიძემ შეურაცხმყოფელად მიიჩნია.

ხორავას ქუჩაზე მოკლული მოზარდის მამა, ზაზა სარალიძე ამბობს, რომ საგამოძიებო კომისიას ენდობა, თუმცა უნდობლობას უცხადებს ეკა ბესელიას.

მისი თქმით, ბესელიამ ის რუსთავი 2-ის ეთერში პოლიტიკურ პარტიებთან კავშირში დაადანაშაულა და ამიტომ მიუღებელია საქმეში არსებული კითხვის ნიშნები საგამოძიებო კომისიის ფორმატში ეკა ბესელიასთან ერთად გაიაროს.

სარალიძის განცხადებას ბესელიამ "პოლიტიკური გზავნილი" უწოდა.

"მე არცერთ ეთერში და, მათ შორის, რუსთავი 2-ის ეთერში, სადაც თქვენც იყავით, არ მიმიცია ჩემი თავისთვის უფლება დამედანაშაულებინეთ რაიმეში! გიცხადებდით და გიცხადებთ სრულ სოლიდარობას", - დაწერა ეკა ბესელია ფეისბუქის ოფიციალურ გვერდზე.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.