ამ წუთებში ხორავას ქუჩის საქმეზე შექმნილ საგამოძიებო კომისიის თავმჯდომარემ ზაზა სარალიძე ხვდება.

მან შეხვედრის დაწყებამდე ჟურნალისტებს განუცხადა, რომ საგამოძიებო კომისიას ენდობა, თუმცა უნდობლობას უცხადებს ეკა ბესელიას. მისი თქმით, ის კომისიის თავმჯდომარესთან დააყენებს საკითხს, რომ ეკა ბესელიამ კომისიაში მუშაობა არ გააგრძელოს.

"თუ ეკა ბესელია იქნება კომისიაში მე კომისიასთან არ ვითანამშრომლებ, სხვა მხრივ, მე მზად ვარ, რომ ყველა ის ინფორმაცია, რაც გამაჩნია ამომწურავად მოგაწოდოთ", - განაცხადა ზაზა სარალიძემ.

მისი თქმით, ეკა ბესელიამ ის რუსთავი 2-ის ეთერში პოლიტიკურ პარტიებთან კავშირში დაადანაშაულა და ამიტომ მიუღებელია საქმეში არსებული კითხვის ნიშნები საგამოძიებო კომისიის ფორმატში ეკა ბესელიასთან ერთად გაიაროს.

ხორავას ქუჩის საქმეზე შექმნილი საგამოძიებო კომისიის პირველი სხდომა დღეს, 8 ივნისს, დღის პირველ საათზე გაიმართება.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.