საქართველოს პარლამენტის იურიდიულ საკითხთა კომიტეტის თავმჯდომარე ეკა ბესელია, ხორავას ქუჩაზე მოკლული მოზარდის დავით სარალიძის მამის ზაზა სარალიძის მიერ დროებითი საგამოძიებო კომისიიდან მისი აცილების მოთხოვნის შესახებ გაკეთებულ განცხადებას გამოეხმაურა.

ეკა ბესელიას თქმით, ზაზა სარალიძის განცხადება პოლიტიკური გზავნილია.

"მე არცერთ ეთერში და მათ შორის რუსთავი 2 ის ეთერში სადაც თქვენც იყავით არ მიმიცია ჩემი თავისთვის უფლება დამედანაშაულებინეთ რაიმეში! გიცხადებდით და გიცხადებთ სრულ სოლიდარობას", - წერს ეკა ბესელია ფეისბუქის ოფიციალურ გვერდზე.

მისივე თქმით, რასაც ეკა ბესელია ნაციონალურ მოძრაობას ეუბნება ზაზა სარალიძეს არ ეხება.

"ძალიან უცნაურია, იმ კომისიაში, სადაც უმრავლესობა ოპოზიციას აქვს და ევროპული საქართველოს, სადაც კომისიის თავმჯდომარე ოპიზიციის წარმომადგენელია, ეკა ბესელიას უცხადებდე უნდობლობას . ეს უკვე მართლაც ბევრის მთქმელია ჩემთვის", - წერს ეკა ბესელია.

ზაზა სარალიძე საგამოძიებო კომისის თავმჯდომარეს სერგი კაპანაძეს ხვდება. მისი თქმით, კომისიას ენდობა, თუმცა უნდობლობას უცხადებს ეკა ბესელიას. ზაზა სარალიძემ განაცხადა, რომ ის კომისიის თავმჯდომარესთან დააყენებს საკითხს, რომ ეკა ბესელიამ კომისიაში მუშაობა არ გააგრძელოს.