მეკლდეური ერეკლე მიქელაძე On.ge-სთან საუბარში ჰყვება, რომ ლეღვთახევში შესასვლელი, სადაც ნახევარ საუკუნეზე მეტია კლდეზე ვარჯიშობენ მცოცავები, შესაძლოა ჩაიკეტოს. ისინი ითხოვენ, რომ საჯარო სივრცეში ჩასასვლელი გაკეთდეს. მისი თქმით, ტერიტორია ყოველთვის საზოგადოებრივი სივრცე იყო და თბილისის მოსახლეობის დიდი ნაწილი იქ აქტიურად ისვენებდა:

"მას შემდეგ, რაც იქ ივანიშვილის ბიზნეს ცენტრი და ტელეკომპანია GDS აშენდა, რამდენჯერმე შეიცვალა ლოჯისტიკურად ჩვენი ადგილი. პანორამა თბილისის მშნებლობის დაწყების შემდეგ კი ტერიტორია ისე შემოიღობა, რომ ჩვენი საცოცი კლდეები იზოლირებულ ადგილად იქცა".

როგორც ერეკლე ამბობს, კლდე რომელსაც მცოცავები სავარჯიშოდ იყენებდნენ, დღეს პანორამა თბილისის ტერიტორიაში არ შედის, თუმცა მისივე თქმით, იქ მოხვედრა ფიზიკურად შეუძლებელია:

"სადაც პანორამასთვის მთა მოიჭრა, იქ დღეს სამშენებლო სამუშაოები მიმდინარეობს, ამჟამად ჩასვლა შესაძლებელია. ერთადერთი შემთხვევა იყო, როცა პანორამას მოწინააღმდეგე აქციის მონაწილეები არ შეუშვეს, მაგრამ ფაქტია, რომ მალე ჩვენც შეგვეზღუდება იქ შესვლის უფლება".

მეკლდეურები ფიქრობენ, რომ პროექტ პანორამას ტერიტორია კერძოა და იქ მშენებლობების დასრულების შემდეგ, მათ ტერიტორიაზე შესვლა აეკრძალებათ:

"ერთადერთი გზა რჩება, რომ ოქროყანაში უნდა ავიდეთ, მდინარისკენ ჩავიდეთ და გავუყვეთ ხეობას ქვევით. ჩვენი კლდე კერძო საკუთრებაში არ არის, მაგრამ პანორამა ღობავს იქ მისასვლელ გზას და პროექტიდან გამომდინარე, ალყაშია მოქცეული. ახლა ვაპირებთ მერიას მოვთხოვოთ, რომ საჯარო სივრცე გაითვალისწინოს და რაიმე მისასვლელი გზა გააკეთონ ისე, რომ არ შეგვეზღუდოს საცოც კლდემდე მისვლა".

ეს არ არის პირველი შემთხვევა, როცა მეკლდეურებს, შესაძლოა, კლდეზე ცოცვა და ვარჯიში შეეზღუდოთ. რამდენიმე თვის წინ, ჭიათურაში, კაცხის სვეტის მიმდებარე ტერიტორიაზე, იქ სადაც კაცხის მონასტერი მდებარეობს, სასულიერო პირებმა კლდეზე მცოცავებს ვარჯიში აუკრძალეს. მიმდებარე ტერიტორიაზე ახალი სამონასტრო კომპლექსის მშენებლობა დაიწყო და ტერიტორია შემოიღობა. მეკლდეურები იძულებული გახდნენ, მოეშალათ საცოცი ინფრასტრუქტურა და დაეტოვებინათ სავარჯიშო ადგილი, სადაც ათწლეულების განმავლობაში ვარჯიშობდნენ.