სახალხო დამცველმა, ნინო ლომჯარიამ ხორავას ქუჩაზე მომხდარ მკვლელობის საქმესთან დაკავშირებით რუსთავი 2-ის ეთერში ისაუბრა. მისი თქმით, გამოძიებას არ მიუქცევია ისეთ მნიშვნელოვან გარემოებებზე ყურადღება, რაზეც რამდენიმე მოწმე საუბრობდა.

"ჩანს გამოძიების ეტაპზე ეს თეთრი ძაფები, რაზეც საუბრობდა დაზარალებული მხარე. მოწმე იძლეოდა ისეთ ჩვენებას, რაზეც გამოძიება უნდა დაწყებულიყო, მაგრამ არ დაწყებულა. მტკიცებულებები არ არის ამოღებული, დაკითხვა აჩენს ეჭვს დასმული შეკითხვები ან არდასმული შეკითხვები აჩენს ეჭვს, არ ჩატარებულა ძირითადი საგამოძიებო მოქმედებები", - განაცხადა ნინო ლომჯარიამ.

სახალხო დამცველის თქმით, სხვადასხვა დაინტერესებული პირების ინტერესთა თანხვედრას შეიძლება ჰქონდა ადგილი ხორავას ქუჩაზე მომხდარი მკვლელობის საქმეში.

31 მაისს თბილისის საქალაქო სასამართლომ ხორავას ქუჩის საქმეზე განზრახ მკვლელობაში მსჯავრდებულს სასჯელის სახით 10 წელი და 6 თვე, ხოლო მკვლელობის მცდელობაში ბრალდებულს 9 წელი და 9 თვე განესაზღვრა.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.