დეკანოზი, რომლის შვილიც რუსთავი 2-ის მიერ გავრცელებული ინფორმაციით, დავით სარალიძის მკვლელობის საქმეში ფიგურირებდა ამბობს, რომ მის შვილს ხელში დანა არ ეჭირა. ტელეკომპანია იმედის ინფორმაციით, ამის შესახებ დეკანოზმა დღეს, 3 ივნისს ქადაგების დროს განაცხადა.

გთავაზობთ იმედის მიერ გავრცელებული ჩანაწერის ფრაგმენტს

ჩემმა შვილმა პირველმა მისცა ჩვენება, ამისთვის შეიძლება აი, ამ ასი კაცის წინაშე ის ცუდი კაცი გამოვა, მაგრამ მან სიმართლე თქვა.

მეგობრისგან დარეკილზე წავიდა დასახმარებლად, როცა ჩაგრავდნენ პატარა ბავშვს უფროსკლასელები. დაურეკა დეიდაშვილს, რომ მე პნევმატური იარაღი მესროლეს სკოლაში და ტუალეტში უნიტაზში თავი ჩამაყოფინესო. როგორ მოიმოქმედებდა თითოეული მათგანი, ვინც იქ გამოსულია და ყვირის, არც იცის რას. პატრულს დაურეკავდა? რომელიმე პატრულს დაურეკავდა? არ აძლევენ ჩვენებას რადგან ქურდული აზროვნებით აზროვნებენ ისინი, მაგრამ მე ისეთ შვილს ვერ ავიტან, ლაჩარს, რომელიც მეგობრის დახმარებაზე უარს იტყვის.

საცოდავია ის ადამიანი ვინც დამნაშავეა და არ აღიარებს, უბედურზე უბედურია. თუ მე სიმართლეს ვამბობ და გასწავლით, შეიძლება მე დავმალო ჩემი შვილის დანაშაული. მე ვიცი და ვმალავ? არ შეიძლებოდა, რომ გამეპარებინა ჩემი შვილი? თქვენ იცით, რომ მე ევროპაში ვმსახურობდი და ბევრი მეგობარი მყავს. შემიძლია თავისუფლად გავაპარო ჩემი შვილი. მაგრამ არავითარ შემთხვევაში. მისგანაც ვიცი და მის გვერდით ვინც იყო იმათგანაც, მას დანა არ ჰქონია.

ტელეკომპანია რუსთავი 2-მა ხორავას ქუჩის საქმეზე სასამართლო პროცესის აუდიოჩანაწერი გაასაჯაროვა, სადაც მოწმე ყვება, რომ დავით სარალიძეს ერთ-ერთი დეკანოზის შვილი ფარდულში გაურკვეველ ნივთს ურტყამდა. დავით სარალიძე ამ დღეს მიყენებული ჭრილობებით გარდაიცვა.

"ზაზა სარალიძე დარწმუნებულია, რომ მის შვილს ჭრილობა მ-მ [სასულიერო პირის შვილი] მიაყენა. ის აცხადებს, რომ ეს ინფორმაცია მან პროკურატურას ჯერ კიდევ სამი თვის წინ მიაწოდა, თუმცა, უწყებაში მას კონკრეტული მტკიცებულებები მოსთხოვეს, რადგან პროკურატურაში განუცხადეს, რომ არასრულწლოვანს ვერ დააკავებდნენ მტკიცებულებების გარეშე", - ამ ინფორმაციას რუსთავი 2 ავრცელებდა.