პარლამენტთან მიმდინარე ოპოზიციური პარტიების აქციაზე 2 პირი დააკავეს. შინაგან საქმეთა სამინისტროს წარმომადგენლის განცხადებით, ისინი გზის გადაკეტვის მცდელობისას დააკავეს.

აქციას ამ დრომდე არ ესწრება ზაზა სარალიძე. ზვიად კუპრავას თქმით, ზაზა სარალიძემ დრო ითხოვა და აქციას მოგვიანებით შეუერთდება. სარალიძე იმყოფებოდა ვაკის პარკთან მიმდინარე აქციაზე აღსრულდეს სამართლიანობა პოლიტიკის გარეშე, რომელიც მალევე დატოვა და განაცხადა, რომ ვერც აქ დაინახა ერთობა.

აქცია გუშინ, ოპოზიციური პარტიების მიერ მას შემდეგ დაანონსდა, რაც ზაზა სარალიძემ მათ მხარდაჭერისკენ მოუწოდა.

2 ივნისს, საღამოს, პარლამენტთან აქციის დასასრულს დაპირისპირება დაიწყო. ზვიად კუპრავამ განაცხადა, რომ ის მოკლული დათო სარალიძისთვის ბრძოლას გაგრძელებდა მამამისთან ერთად ან მის გარეშე. პარალელურად, ზაზა სარალიძე შევიდა კარავში და საზოგადოებისთვის უცნობი იყო რა მოხდა მასსა და კუპრავას შორის.

მან მოუწოდა პოლიტიკურ პარტიებს გაერთიანებისკენ. ამის შემდეგ კუპრავა ეროვნულ დემოკრატიული პარტიის ოფისში პოლიტიკურ პარტიებთან შესახვედრად წავიდა.

მოგვიანებით, სარალიძემ განაცხადა, რომ გავრცელებული ინფორმაცია მისი და კუპრავას დაპირისპირების შესახებ სიმართლეს არ შეესაბამებოდა. მან მოუწოდა პოლიტიკურ პარტიებს გაერთიანებისა და სისტემის ჩამოშლისაკენ.