საქართველოს სახალხო დამცველი, ნინო ლომჯარია მიიჩნევს, რომ საქართველოში ახალი მთავარი პროკურორი ფართო საზოგადოებრივი წრეებისთვის მისაღები უნდა იყოს. ამის შესახებ ომბუდსმენმა დღეს, პირველ ივნისს, მთავარი პროკურორის გადადგომის მეორე დღეს განაცხადა.

სახალხო დამცველი ამბობს, რომ მთავარი პროკურორის თანამდებობაზე შერჩეული პირი აპოლიტიკური და პროფესიონალი უნდა იყოს.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

ამ გადაწყვეტილების შემდეგ თბილისში, მთავარ პროკურატურასთან აქცია დაიწყო. აქციის დაწყებიდან რამდენიმე საათში მთავარი პროკურორი, ირაკლი შოთაძე გადადგა.

გაიგეთ მეტი ხორავას ქუჩის საქმესთან დაკავშირებულ მოვლენებზე.