სომხეთის პრეზიდენტმა, სერჟ სარგისიანმა ერევანში, პოლიციის შენობაზე თავდამსხმელებს მოუწოდა, გაათავისუფლონ მძევლები და დააწყონ იარაღი. ეს ქვეყნის პრეზიდენტის პირველი განცხადებაა მას შემდეგ, რაც ოპოზიციური მოძრაობის ლიდერის, ჟირაირა სეფილიანის მხარდამჭერმა ჯგუფმა ერებუნის რაიონში პოლიციის შენობა დაიკავა და მძევლები აიყვანა. ინფორმაციას Ekhokavkaza BBC-ის რუსულ ბიუროზე დაყრდნობით ავრცელებს.

პრეზიდენტის პრესსამსახურის ცნობით, სარგისიანი ამბობს, რომ შემდეგი ნაბიჯები სომხეთის კონსტიტუციისა და კანონმდებლობის შესაბამისად გადაიდგმება. მისი თქმით, პირადი შურისძიების ყველა მცდელობა ჩახშობილი იქნება კანონის ძალით. სარგისიანის განმარტებთ, შექმნილი სიტუაციის დასარეგულირებლად ყველა მშვიდობიანი გზა უნდა გამოიყენონ:

"ჩვენს ქვეყანას რთული და საპასუხისმგებლო დღეები აქვს. არ მინდა ახლა ამის მიზეზებს შევეხო, ახლა ამის დრო არ არის. ვიტყვი მხოლოდ იმას, რომ ყველა ჩვენგანისთვის ეს გაკვეთილი უნდა იყოს".

გუშინ ერევანში 2 პირი დააკავეს, რომელთაც შეიარაღებულ თავდამსხმელებთან კავშირში ადანაშაულებენ. ერთ-ერთ დაკავებულ შეიარაღებული იყო და პოლიციის შენობაში შეღწევის მცდელობა ჰქონდა.

გარდა ამისა, ვრცელდებოდა ინფორმაციაც, რომ ერევანში განვითარებული მოვლენების გამო ადგილობრივი მთავრობა გადადგომას აპირებდა, თუმცა ქვეყნის პარლამენტის სპიკერმა, გალუსტ სააკიანმა აღნიშნული უარყო.

17 ივლისს ოპოზიციური მოძრაობის - დამფუძნებელთა პარლამენტის მეთაურის, ჟირაირა სეფილიანის გათავისუფლების მოთხოვნით შეიარაღებული დაჯგუფება პოლიციის შენობაში შეიჭრა და მძევლები აიყვანა. გარდაიცვალა 1 პოლიციელი.

გასული დღეების განმავლობაში შენობის მიმდებარედ აღნიშნული ჯგუფის მხარდამჭერები აქციას მართავდნენ, რის შედეგადაც მომიტინგეებსა და პოლიციელებს შორის რამდენიმე შეტაკებაც მოხდა. გავრცელებული ინფორმაციით, აღნიშნულის გამო 136 პირი დააკავეს.

სომხეთში მიმდინარე ამბოხის შესახებ დეტალურ ინფორმაციას შეგიძლიათ გაეცნოთ აქ: