22 ივლისს, შავი ზღვის მე-10 ჯაზფესტივალის ფარგლებში, ბათუმის ჩოგბურთის კლუბში, მომღერალ ჯეიმი კალუმის ნაცვლად, კონცერტს ამერიკელი ბასისტი, კომპოზიტორი და მომღერალი ნიკ ვესტი გამართავს. 23 ივლისს კი ამერიკელ პოპვარსკვლავ ქრის ბრაუნს, ცნობილი ამერიკელი რეპერი, პროდიუსერი და მსახიობი ბასტა რაიმსი ჩაანაცვლებს.

ორგანიზატორების განცხადებით, პროგრამაში შეტანილი ცვლილებები ვარსკვლავების თხოვნით მოხდა. ქრის ბრაუნი და ჯეიმი კალუმი ბათუმს თურქეთში მომხდარი უკანასკნელი მოვლენების გამო ვეღარ სტუმრობენ.

ისთერნფრომოუშენი ავრცელებს ინფორმაციას, რომ ერთ დღეში გააფორმა კონტრაქტი ამერიკელ რეპერ ბასტა რაიმსთან, რომელიც მსმენელის წინაშე 23 ივლისს საათნახევრიანი პროგრამით წარდგება. მათი განცხადებით, ჯეიმი კალუმი საქართველოს მოგვიანებით, 10 ნოემბერს, ამჯერად, თბილისის ჯაზფესტივალის ფარგლებში ეწვევა.

ისთერნფრომოუშენი ბოდიშს უხდის ფესტივალის სტუმრებს და მათ მსგავს გამოსავალს სთავაზობს : ვინც ამ ორი კონცერტის ბილეთი უკვე შეიძინა, ორი გზიდან მისთვის სასურველის არჩევის შესაძლებლობა ეძლევა:

  1. ჯეიმის კალუმის და ქრის ბრაუნის კონცერტზე დასასწრები ბილეთით მსმენელი შეძლებს (ანალოგიურად) ნიკ ვესტის და ბასტა რაიმსის კონცერტზე დასწრებას;
  2. სურვილის შემთხვევაში, მსმენელს ბილეთის უკან დაბრუნების საშუალება აქვს - გადახდილი თანხა სრულად ანაზღაურდება;

შავი ზღვის მე-10 ჯაზფესტივალმა სტარტი 15 ივლისს აიღო და უკვე კულმინაციას უახლოვდება. 24 ივლისს ფესტივალი მეისი გრეის კონცერტით უნდა დაიხუროს.