თბილისის მერია თბილისში, დამოუკიდებლობის დღისადმი მიძღვნილი ღონისძიებების ნუსხას აქვეყნებს. 2018 წლის 26 მაისს, რუსთაველის გამზირზე მთელი დღის განმავლობაში სხვადასხვა სახის აქტივობები და კონცერტებია დაგეგმილი.

On.ge გთავაზობთ დაგეგმილი ღონისძიებების სიას:

  • ექსპოზიცია "პოსტერი 100" - ღია ცის ქვეშ, რუსთაველის გამზირზე 100 პოსტერისგან შემდგარი გამოფენა გაიმართება. პროექტში მონაწილეობას მიიღებენ სხვადასხვა თაობის არტისტები, მხატვრები, გრაფიკული დიზაინერები, სამხატვრო სტუდიები და სახელოსნოები, ასევე სტუდენტები;
  • ლოგო "100" - რუსთაველის გამზირზე, სპეციალურად შერჩეულ ადგილას, საქართველოს დამოუკიდებლობის დღის საიუბილეო თარიღისადმი მიძღვნილი მოცულობითი ზომის ლოგო განთავსდება, რომელზეც დავით კაკაბაძის ცნობილი ფერწერული ტილოს პრინტი იქნება დატანილი;
  • ინსტალაცია "100" - რკინის კონსტრუქცია, მოცულობითი ციფრები თანდართული საგამოფენო სტენდით, ჩამონტაჟებული ფოტომასალით, ოპერის წინ;
  • კინოჩვენება - პროექტი გულისხმობს ძველი კინოთეატრის გაცოცხლებას. ოპერის მიმდებარედ განთავსდება კინო-პავილიონი შესაბამისი თემატური რეკვიზიტებით და დღის განმავლობაში გაეშვება სხვადასხვა ძველი ფილმები, ასევე ღონისძიებისთვის მომზადებული 25 წუთიანი ფილმი სახელწოდებით - "1918-2018";
  • საბავშვო სივრცეები - პარლამენტის შენობის წინ მოეწყობა 3 საბავშვო გასართობის სივრცე;
  • საბავშვო სცენა/კონცერტები - რუსთაველის გამზირზე მოეწყობა სცენა, სადაც დღის განმავლობაში სხვადასხვა საბავშვო სტუდიის კონცერტები გაიმართება;
  • ყვავილების ფესტივალი - წარმოდგენილი იქნება დეკორატიული მცენარეები, ცოცხალი ყვავილების პანოები, დამთვალიერებელთათვის მოეწყობა "მწვანე გაკვეთილები", რომლებზეც გამოცდილი ფლორისტები, მსურველებს დეკორატიულ ქოთნებსა და ყვავილების გვირგვინებს დაამზადებინებენ.

    ვარდების მოედანზე არსებული 300 წლის ზეთისხილის ხე მხატვრულად განათდება.

  • გალა კონცერტი - 2018 წლის 26 მაისს 21 საათზე, რუსთაველის გამზირზე, საქართველოს დამოუკიდებლობის დღის 100 წლისადმი მიძღვნილი გრანდიოზული გალა კონცერტი გაიმართება.

    სპეციალურად კონცერტისთვის 5 ცნობილი ქართველი კომპოზიტორი განსხვავებული ჟანრის ნამუშევარს შექმნის. საქართველოს დამოუკიდებლობის ასი წელი ხუთ პირობით ეპოქად იქნება დაყოფილი, თითოეულ ეტაპს კონკრეტული კომპოზიტორი თავის ნამუშევარს მიუძღვნის.

    26 მაისისადმი მიძღვნილი ღონისძიებები ფოიერვერკით დასრულდება.