თბილისის სააპელაციო სასამართლომ გაიზიარა ბრალდების საჩვარი და ბესო ხარძიანის მკვლელობის უშუალო აღმსრულებელს უვადო თავისუფლების აღკვეთა განუსაზღვრა. მკვლელობაში დამხმარე პირს კი შეფარდებული სასჯელი (19 წლით თავისუფლების აღკვეთა) უცვლელად დაუტოვეს.

2017 წლის 28 სექტემბრის განაჩენით თბილისის საქალაქო სასამართლომ სრულად გაიზიარა პროკურატურის პოზიცია კვალიფიკაციის ნაწილში და ბრალდებულებს 19-19 წლით თავისუფლების აღკვეთა მიუსაჯა.

მსჯავრდებულები იმყოფებიან მიმალვაში და მათ მიმართ გამოცხადებულია ძებნა.

ხარძიანის მკვლელობის საქმის დეტალები

პროკურატურის ცნობით, ბესო ხარძიანის განზრახ მკვლელობის მიზნით, 2015 წლის 13 იანვარს, ფ.გ., ოლექს ანდრდამეტოვის სახელზე შედგენილი უკრაინის რესპუბლიკის ყალბი პასპორტის გამოყენებით, ო.დ.-სთან ერთად ჩამოფრინდა თბილისში. მათ ხანგრძლივი ვადით იქირავეს ბინა თბილისში, შეიძინეს სპეციალურად შერჩეული ჰონდას მარკის მოპედი (სკუტერი), ჩაფხუტი, კუსტარული წესით დამზადებული მაყუჩის მქონე "მაკაროვის" სისტემის პისტოლეტი საბრძოლო ვაზნებით. ნაქირავებ ბინაში ცხოვრობდნენ კონსპირაციულად და სისტემატიურად აკონტროლებდნენ ბესო ხარძიანის მოძრაობის მარშრუტს მკვლელობისთვის ხელსაყრელი დროის შესარჩევად.

საქმის მასალების თანახმად, 2015 წლის 28 მარტს, შუადღის საათებში, ფ.გ. ბესო ხარძიანს შეჰყვა სადარბაზოში და მაკაროვის სისტემის მაყუჩიანი ცეცხლსასროლი იარაღიდან სამჯერ ესროლა, მათ შორის ერთი საკონტროლო თავის არეში. იმავე დღეს, ფ.გ.-მ და ო.დ.-მ სარფის საბაჟო-გამშვები პუნქტის გავლით, დატოვეს საქართველოს სახელმწიფო საზღვარი.

ფ.გ.-ს ბრალად წარდგენილი ჰქონდა განზრახ მკვლელობა შეკვეთით, ცეცხლსასროლი იარაღისა და საბრძოლო მასალის მართლსაწინააღმდეგო შეძენა, შენახვა და ტარება, საქართველოს სახელმწიფო საზღვრის უკანონოდ გადაკვეთა და ყალბი ოფიციალური დოკუმენტის გამოყენება.