აშშ-ის ვიცე-პრეზიდენტმა, მაიკ პენსმა Fox News-ს ინტერვიუში ჩრდილოეთ კორეის ლიდერი, კიმ ჩენ ინი გააფრთხილა, რომ 12 ივნისს შეხვედრის დროს დონალდ ტრამპთან "თამაში" არ სცადოს.

"კიმ ჩენ ინის მხრიდან დიდი შეცდომა იქნებოდა გაეფიქრა, რომ მას დონალდ ტრამპთან თამაში შეუძლია", - განაცხადა პენსმა.

კითხვაზე, შეუძლია თუ არა აშშ-ის პრეზიდენტს ჩრდილოეთ კორეის ლიდერთან შეხვედრაზე უარი თქვას, პენსმა უპასუხა, რომ შესაძლებელია:

"მგონია, რომ ტრამპი თვითრეკლამით არაა დაკავებული, ის მშვიდობაზე ფიქრობს".

აშშ-სა და ჩრდილოეთ კორეის კიდევ ერთი საჯარო დაპირისპირება უსაფრთხოების საკითხებში ტრამპის მრჩევლის, ჯონ ბოლტონის განცხადებას მოჰყვა. ბოლტონმა განაცხადა, რომ ფხენიანის ბირთვული განიარაღება შესაძლოა, "ლიბიის სცენარით" წარიმართოს.

მსგავსმა განცხადებამ ფხენიანი შეაშფოთა. ლიბიის ლიდერი, მუამარ კადაფი 2003 წელს საერთაშორისო შემოწმებას დათანხმდა, რათა დაემტკიცებინა, რომ ბირთვული პროგრამა სრულად დახურა. რვა წლის შემდეგ კი კადაფი მეამბოხეებმა მოკლეს.

რამდენიმე დღის წინ ჩრდილოეთ კორეამსამხრეთ კორეის წარმომადგენლებთან დაგეგმილი მაღალი დონის შეხვედრა გააუქმა. გადაწყვეტილება მას შემდეგ მიიღეს, რაც აშშ-მ და სამხრეთ კორეამ სამხედრო წვრთნები ჩაატარეს.

ჩრდილოეთ კორეის სახელმწიფო მაუწყებელმა განაცხადა, რომ წვრთნები პროვოკაცია და სამხედრო შეჭრისთვის მზადება იყო.

მათ აშშ-ს წარმომადგენლებს ურჩიეს მოუფრთხილდნენ კიმ ჩენ ინისა და აშშ-ის პრეზიდენტის, დონალდ ტრამპის სამომავლო ისტორიული სამიტის ბედს, რომელიც 12 ივნისს სინგაპურში გაიმართება.

აშშ-ს სახელმწიფო დეპარტამენტმა განაცხადა, რომ ისინი კვლავ ემზადებიან სამიტისთვის და არ იციან ჩრდილოეთ კორეის პოზიციის რაიმე ცვლილების შესახებ.