თბილისის ზოოპარკში მობინადრე სამხრეთ-ამერიკულმა ალპაკამ, სახელად კარმენმა, ერთი თვის წინ შვილი გააჩინა. შვილის მამა ტომასია, ხოლო თავად პატარა ალპაკას, პაჩა დაარქვეს. ამის შესახებ, On.ge-ს თბილისის ზოოპარკმა უთხრა.

ფოტო, რომელიც ზოოპაკის ფეისბუქ გვერდზე გავრცელდა, დედა-შვილის პირველი შეხვედრის ემოციური მომენტია ასახული.

"ორიოდ საათის გაჩენილი ჰყავს ეს წვრილკისერა ცუნციკო. ჩვენებურად, ადამიანურად ვერ იხუტებს გულში. სამაგიეროდ თავისებურად, ალპაკურად ეალერსება: გაბურძგნულ თავს უცაცუნებს, ასუფთავებს, ეფერება... და თითქოს სახეზეც ეტყობა, რას გრძნობს და განიცდის ამ მომენტში", - წერია პოსტზე.

ეს ფოტო კიდევ ერთხელ გვახსენებს, რომ დედა-შვილის სიყვარული ცხოველებშიც ისეთივე ძლიერია, როგორც ადამიანებში.