პირი, რომელიც ტელეწამყვან ინგა გრიგოლიას ემუქრებოდა, მუქარისა და ადევნების მუხლებითაა დაკავებული. ამის შესახებ შინაგან საქმეთა სამინისტროს ადამიანის უფლებათა დაცვის დეპარტამენტის ხელმძღვანელმა, ლონდა თოლრაიამ ტვ პირველის ეთერში ისაუბრა.

მისივე განმარტებით, ინგა გრიგოლიას გამოკითხვისა და სხვა მტკიცებულებების მოპოვების შემდეგ სისხლის სამართლის დანაშაული - ადევნება გამოიკვეთა.

ლონდა თოლორაიას თქმით, მუქარისთვის გათვალისწინებულია თავისუფლების აღკვეთა 1 წლამდე, ხოლო ადევნებისთვის 2 წლამდე ვადით. მისივე ცნობთ, ამ წუთებში პირის გამოკითხვა მიმდინარეობს.

ბრალდებული საგამოძიებო ორგანოში დღეს, 21 მაისს დააკავეს.

ინგა გრიგოლიას მიმართ მუქარის საქმე

გრიგოლიას თქმით, მის ტელეფონზე ზარები და შეტყობინებები 2011 წლიდან შედის, ურეკავს კაცი, რომელიც მაშინ ციხეში იყო და ეუბნება, რომ მისი შვილის მამაა (მისი შვილის მამა გარდაცვლილია). როგორც ჟურნალისტი ყვება, ეს კაცი ციხიდან 2013 წლის საყოველთაო ამნისტიის დროს გამოვიდა და გააგრძელა მასთან დარეკვა.

"იძულებული გავხდი, განცხადება დამეწერა პოლიციაში, რადგან რაღაც გაუგებარ ქონებას და ფულს მთხოვდა და იმუქრებოდა. ითხოვდა არარსებულ შვილთან შეხვედრას. ვიარე პოლიციაში, დაიწყო გამოძიება, გამომძიებლები მშვიდად მიხსნიდნენ, რომ ტიპი ამტკიცებდა, თითქოს ჩემი ქმარი იყო, რომელსაც ქონება წავართვი. ყველაზე გულისამრევი ის იყო, რომ როცა ამ ტიპის ჩვენებას მიკითხავდნენ,თან ისე იღრიჭებოდნენ, თითქოს ძალიან გასართობი ამბავი ხდებოდა", - აღნიშნავს გრიგოლია.

მისივე მონაყოლიდან ირკვევა, რომ ბოლო წერილი კაცმა გრიგოლიას TV პირველში დაუტოვა, რომელშიც ეწერა, რომ 20 მაისამდე ქონებას თუ არ დაუბრუნებს, სახლის კარს შეამტვრევს.

"არ ვიცი ამჯერად რითი დასრულდება ჩემი მიმართვა პოლიციის მიმართ, თუმცა კი ვიმედოვნებ. როგორც ზევით დავწერე, ხვალიდან შეიარაღებული ვივლი", - აღნიშნავს გრიგოლია.