საქართველოს პრეზიდენტის გიორგი მარგველაშვილის განცხადებით, ამ დღეების განმავლობაში საზოგადოებამ იხილა როგორც პოლიტიკური, ისე ადმინისტრაციული ქმედებების სრული კრახი და შეცდომების მთელი წყება, რომელიც დაიწყო რეიდით თუ სპეცოპერაციით და შემდეგაც გრძელდებოდა.

გიორგი მარგველაშვილის თქმით, მას კითხვა უჩნდება, როგორ მოახერხა ხელისუფლებამ რამდენიმე საათში სამოქალაქო დაპირისპირების ზენიტამდე მისვლა.

"ბუნებრივია, ამ კითხვის ნიშნებს სჭირდება ძალიან პირდაპირი პასუხები. რანაირად შეიძლება რამდენიმე საათში მოვახერხოთ, რომ მივიდეთ იმ წერტილამდე, რომ კინაღამ სამოქალაქო დაპირისპირების ზღვარზე აღმოვჩნდით. შესაბამისად, ჩვენი მიზანი იყო და რჩება შევინარჩუნოთ ერთდროულად გამოხატვისა და სიტყვის თავისუფლება, ამავე დროს, მოვახერხოთ და წესრიგი იქნას შენარჩუნებული, როგორც დედაქალაქის ქუჩებში, ასევე საზოგადოებრივ-პოლიტიკურ პროცესში", - განაცხადა გიორგი მარგველაშვილმა.

პრეზიდენტმა მადლობა გადაუხადა იმ პოლიციელებს, რომლებიც აქციაზე უსაფრთხოებას უზრუნველყოფდნენ.

პარასკევს, ბასიანსა და გალერიში ჩატარებული სპეცოპერაციის გასაპროტესტებლად პარლამენტთან დაწყებული აქცია 2 დღის განმავლობაში გაგრძელდა. აქციის მონაწილეები შს მინისტრისა და საქართველოს პრემიერის გადადგომას ითხოვდნენ. მათი მთავარი მოთხოვა ასევე მიმართული იყო ნარკოპოლიტიკის რეფორმისკენ და ძალადობის წინააღმდეგ. აქციის მონაწილეებმა ძალადობა ცეკვით და მუსიკით გააპროტესტეს. შს მინისტრმა აქციის მონაწილეებს მიმართა და ბოდიში მოიხადა, ასევე დადო პირობა, რომ აქციის მონაწილეების ყველა კითხვებს უპასუხებს. აქცია შს მინისტრთან მოლაპარაკებების მიღწევის შემდეგ დაიშალა.

თეთრი ხმაურის მოძრაობამ ხელისუფლებას ვადა, დაპირებების შესასრულებლად შაბათამდე მისცა.