საქართველოს განათლებისა და მეცნიერების მინისტრის მიხეილ ჩხენკელის განცხადებით, სოფლის სკოლები საგანმანათლებლო-კულტურულ ცენტრებად გარდაიქმნება, რომლებიც საბავშვო ბაღს, სკოლას, კოლეჯს, ბიბლიოთეკას, სპორტულ და შემოქმედებით კლუბებს გააერთიანებს.

ამის შესახებ მინისტრმა სამინისტროს სამოქმედო გეგმის პრეზენტაციისას განაცხადა.

"სოფლებში სკოლა ღია იქნება სოფლის მოსახლეობისთვის გაკვეთილების დასრულების შემდეგ. მათ საშუალება ექნებათ გააგრძელონ განათლება, გაიღრმავონ ცოდნა სხვადასხვა დარგში", - განაცხადა მიხეილ ჩხენკელმა.

საქართველოს განათლებისა და მეცნიერების მინისტრმა მიხეილ ჩხენკელმა მინისტრად დანიშვნიდან 6 თვის შემდეგ, ახალი სამოქმედო გეგმა წარადგინა.

ცვლილებები განათლების სისტემაში ოთხ მთავარ მიმართულებას მოიცავს: ზოგად, უმაღლეს და პროფესიულ განათლებას, ასევე ახალგაზრდული პოლიტიკას.