შინაგან საქმეთა სამინისტროს განცხადებით, ნარკოტიკული საშუალების შემცველი მცენარის უკანონო დათესვა, მოყვანა ან კულტივირების მიმდინარე გამოძიების ფარგლებში პარტია გირჩის წევრი ნიკა ობოლაძე გამოავლინეს.

უწყება აცხადებს, რომ პოლიციამ სავარაუდო ნარკოტიკული საშაულება კანაფი ნივთმტკიცებად ამოიღო. ამჟამად, ნიკა ობოლაძე მოწმის სტატუსით პოლიციაში იკითხება.

შსს-ს ცნობით, გამოძიება სისხლის სამართლის კოდექსის 265-ე მუხლით მიმდინარეობს.

ასევე იკითხება გირჩი ერთ-ერთი წევრი ვახო მეგრელიშვილი.

ნიკა ობოლაძის დაკავებამდე, დღეს, 2 მაისს, თბილისში, პარტია გირჩის ოფისის მახლობლად, სამოქალაქო ფორმით მისულმა შსს-ს თანამშრომლებმა ერთი პირი, ნარკოდანაშაულის ბრალდებით დააკავეს. გირჩის წევრების ცნობით, მათ ფანჯრიდან დაინახეს, რომ ის ძირს დააწვინეს და ამ ფორმით ცდილობდნენ დაეკავებინათ. მათივე ინფორმაციით, შსს-ს წარმომადგენლები აცხადებდნენ, რომ მათ ოპერატიული ინფორმაციის საფუძველზე უნდა გადაეყვანათ ის ნარკოტესტირებაზე.

პოლიციის შენობასთან მისულმა გირჩის წევრებმა ქოთანი მიიტანეს, რომელშიც, როგორც თვითონ ამბობენ, მარიხუანაა დარგული. ცოტა ხნის შემდეგ, შენობიდან გამოსულმა პოლიციელმა ახსნა-განმარტების გარეშე განყოფილებაში შეიყვანა ნიკა ობოლაძე, რომელსაც ხელში ქოთანი ეჭირა. გირჩის წევრები ამბობენ, რომ ობოლაძე ქოთნის გამო დააკავეს, რომელიც ყველას ეკუთვნოდა.