ხე, რომელიც საფრანგეთის პრეზიდენტმა, ემანუელ მაკრონმა დონალდ ტრამპს აჩუქა, თეთრი სახლის ეზოდან გაუჩინარდა.

Reuters-ის ფოტოგრაფმა, იური გრიპასმა ის ადგილი დააფიქსირა ფოტოზე, სადაც პრეზიდენტებმა მუხის ნერგი დარგეს. The Guardian-ის ცნობით, იქ სადაც ნერგი იყო, ახლა გაზონზე მხოლოდ ყვითელი ლაქაა.

ემანუელ მაკრონი ხუთი დღის წინ სახელმწიფო ვიზიტით ვაშინგტონში იმყოფებოდა. მაშინ მან ტვიტერის საკუთარ გვერდზე თავისი საჩუქრის შინაარსზე დაწერა:

"100 წლის წინ ამერიკელი ჯარისკაცები იბრძოდნენ საფრანგეთში, ჩვენი თავისუფლების დასაცავად. ეს მუხის ხე თეთრ სახლში, ჩვენი კავშირების შემახსენებელი იქნება".