დღეს, 29 აპრილს, ტრიპოლიში გამართულ სასამართლო სხდომაზე, მოსამართლემ მეზღვაური სოსლან კაკაბაძე უდანაშაულოდ სცნო. ამის შესახებ საკონსულო დეპარტამენტის დირექტორის მოადგილემ, ვლადიმერ კონსტანტინიდმა On.ge-ს განუცხადა.

მისივე ინფორმაციით, ქართველი მეზღვაურის გათავისუფლების შემდეგ, ლიბიის სადეპორტაციო პროცესურებს კიდევ რამდენიმე დღე დასჭირდება, რომლის დასრულების შემდეგ, სოსლან კაკაბაძე დაბრუნდება საქართველოში.

ლიბიაში დაკავებული კიდევ ერთი მეზღვაური, ნუკრი ხოხბა საქართველოში 13 მარტს დაბრუნდა.

ვლადიმერ კონსტანტინიდის თქმით, პატიმრობაში მყოფ კიდევ ორი ქართველი მეზღვაურის, რომან კაკალაძისა და გენადი კომახიძის საქმეებზე არსებითი განხილვები ისევ გრძელდება და მომდევნო სხდომა 20 მაისს ჩაინიშნა.

ეგვიპტეში საქართველოს ელჩი ალექსანდრე ნალბანდოვი ამჟამად ლიბიაში იმყოფება. საკონსულო დეპარტამენტის წარმომადგენლის ცნობით, ელჩმა დაკავებული ქართველი მეზღვაურები უკვე მოინახულა და მართავს შეხვედრებს ლიბიის საგარეო უწყებასთან.

სოსლან კაკაბაძემ 2 წელი და 8 თვე გაატარა ლიბიის საპატიმროში. ის 2015 წლის აგვისტოში, კოკის (მზარეულის) პოზიციაზე, ტოგოს დროშის ქვეშ მცურავ, მალტის მცირე ზომის სანავთობო ტანკერ Sovereign M-ზე დასაქმდა.

მალტურ ტანკერს ეგვიპტელი კაპიტანი მართავდა, ეკიპაჟი კი თითო ხორვატი, მალტელი და ეგვიპტელი მეზღვაურისგან შედგებოდა. ქართველი კაკაბაძე მათ 2015 წლის 12 აგვისტოს შეუერთდა. 24 აგვისტოს კი ლიბიის ქალაქ საბრათას პორტთან ახლოს, ცარიელი ტანკერი ადგილობრივმა სანაპირო დაცვამ დააკავა.

ლიბიური ბრალდების მხარის მტკიცებით, ტანკერი კონტრაბანდული ნავთობის გადაზიდვას გეგმავდა. დაკავების დროს მესაზღვრეებმა ტანკერის ეკიპაჟის წევრები სასტიკად სცემეს. სოსლან კაკაბაძე თავიდან, 60 პატიმართან ერთად ღია ცის ქვეშ, რკინის გალიაში, გაუსაძლის და აუტანელ პირობებში იყო გამოკეტილი.

გაიგეთ მეტი: