ქართულ მედიაში ვრცელდება ინფორმაცია, რომ თურქეთის პრეზიდენტმა, რეჯებ ტაიპ ერდოღანმა, სამხედრო გადატრიალების მცდელობაში ამერიკის შეერთებული შტატები დაადანაშაულა.

ქართული მედია ამ ინფორმაციას, თითქოს და, როიტერზე დაყრდნობით წერს. თუმცა, არც როიტერი და არც სხვა რომელიმე უცხოური საინფორმაციო სააგენტოს მსგავს ინფორმაციას არ ავრცელებს.

სინამდვილეში, რეჯეპ ტაიპ ერდოღანმა გადატრიალების ორგანიზებაში აშშ-ში მცხოვრები თურქი სასულიერო პირი ფეტულა გულენი დაადანაშაულა. ერდოღანის თქმით, მეამბოხეები ბრძანებებს მისგან იღებდნენ.

შესაბამისად, ოფიციალურ ანკარასა და ვაშინგტონს შორის არანაირი დაპირისპირება არ არსებობს.

ფეტულა გულენი აშშ-ში 1999 წელს გადასახლდა, მას შემდეგ რაც ექსტრემისტულ ისლამისტურ ქმედებებში დაადანაშაულეს.

გულენი 2013 წლამდე ერდოღანის მოკავშირედ ითვლებოდა, ვიდრე ერდოღანის, რომელიც მაშინ პრემიერ მინისტრი იყო, და მისი კაბინეტის გარშემო კორუფციის შესახებ გამოძიება არ დაიწყო. ერდოღანმა გამოძიებას ბინძური ოპერაცია უწოდა და მის ორგანიზებაში გულენი დაადანაშაულა.

ფეტულა გულენი გავლენიანი ისლამისტი ლიდერია, რომელსაც რამდენიმე ათეული წიგნი აქვს გამოცემული და მსოფლიოს გარშემო რამდენიმე ბიზნესსა და სასწავლებელს ფლობს.

ერდოღანმა რამდენიმეჯერ მოითხოვა აშშ-დან მისი ექსტრადიცია.