თბილისის მერიასა და მეტროს თანამშრომლებს შორის მედიაცია გრძელდება. მეტროს მემანქანეებმა შეთანხმებას ვერც გუშინ, 25 აპრილის შეხვედრაზე მიაღწიეს, სამუშაო რეჟიმი გრძელდება. ამის შესახებ On.ge-ს თბილისის მეტროს მემანქანემ და "ერთობა 2013"-ის თავმჯდომარემ, რატი კაპანაძემ.

"სამშაბათს [პირველ მაისს] უკვე გვეცოდინება თუ რა იქნება იქედან კონკრეტული შემოთავაზებები", - ამბობს კაპანაძე და დასძენს, რომ მედია ამ დრომდე გრძელდება.

მისი თქმით, შეხვედრაზე მერიის წარმომადგენლებმა აღნიშნეს, რომ დედაქალაქში მძიმე სოციალური პირობებია და ამ მიზეზით ძნელია ხელფასის გაზრდა.

"ზოგადად, მე არ მახსენდება არც ერთი ხელისუფალი და არცერთი კომპანიის ხელმძღვანელი რომ მოსულიყო, აი, თანხები გამომიჩნდა და მე უნდა გავზარდო ხელფასები", - ამბობს კაპანაძე, რომლის თქმითაც, ხელფასის მომატების გარეშე მათი პროტესტი არ შეწყდება.

თბილისის მერიის მიერ On.ge-სთვის მოწოდებულ ვიდეოჩანაწერში მერის მოადგილე, ირაკლი ხმალაძე ამბობს, რომ გადაწყვეტილება იმ რესურსებიდან გამომდინარე უნდა მიიღონ, რაც მუნიციპალიტეტს აქვს.

"მართალია, ადამიანების ანაზღაურება არ პასუხობდეს იმ სამუშაოს და იმ ხარისხს, რასაც ისინი აკეთებენ, მაგრამ უნდა პასუხობდეს იმ შესაძლებლობებს, რომელიც სტრუქტურას გააჩნია", - თქვა ირაკლი ხმალაძემ.

მისი თქმით, სატრანსპორტო კომპანიას არ აქვს იმხელა ფინანსური რესურსი, რომ მეტროს თანამშრომლების მიერ მოთხოვნილი ანაზღაურების სრულად გაცემა შესაძლებელი იყოს.

თითქმის ორი წელი გავიდა, თბილისის მეტროს მემანქანეების პრობლემები და მოთხოვნები კვლავ არ იცვლება. დასაქმებულები 2016 წლის მსგავსად, ხელფასების 45-პროცენტიან ზრდას ითხოვენ. მეტროს მემანქანები ამბობენ, რომ საშუალო ხელფასი 1138-1180 ლარია, 45 პროცენტიანი მატების შემთხვევაში კი საშუალოდ 1600 ლარი იქნება.

ამავე თემაზე: